Ólafur Ragnar Grímsson, fyrrverandi forseti Íslands, segir að eiginkona hans, Dorrit Moussaieff, hafi stungið upp á því að halda tónlistarhátíð við eldstöðvarnar í Geldingadölum.
Ólafur Ragnar er nokkuð virkur á Twitter þar sem hann greinir frá þessu. Þar birtir hann tilkomumikla mynd af eldgosinu og segir að Dorrit hafi, á eigin Instagram-síðu, stungið upp á því að tónlistarhátíð fari fram á svæðinu og leiti nú að nafni.
Spyr Ólafur fylgjendur sína hvað hátíðin gæti heitið og segir hann að ein uppástungan hafi verið Volstock sem dregur nafn sitt af einni þekktustu tónlistarhátíð sögunnar, Woodstock.
Nokkrir hafa skrifað athugasemdir við færslu Ólafs. Einn stingur upp á nafninu Fagradals Open Fire Festival en annar stingur upp á nafninu Lavafest feat Dj Magma. Sá þriðji á þá einu ósk heitasta að sjá Mezzoforte á hátíðinni.
Ólíklegt þykir að forsetahjónunum fyrrverandi verði að ósk sinni enda líkur á að enn verði bið á því að stórar fjöldasamkomur verði leyfðar í ljósi nýrra tilfella COVID-19. Þá getur gasmengun sett strik í reikninginn og mikilvægt að fara að öllu með gát í nágrenni eldgossins.
In the light of the great global reaction to this photo #Dorrit has proposed on her #Instagram an annual musical folk festival close to the new volcano. Competition for the name of the festival now open here. One suggestion: Volstock, inspired by the famous festival. Your ideas? pic.twitter.com/LNM1lvIqjl
— Ólafur Ragnar Grímsson (@ORGrimsson) March 24, 2021
