„Tæpt ár er síðan ég spurði Eyþór Arnalds hvort afskriftir Samherja hafi verið gjöf eða eftirgjöf skuldar til hans, kjörins fulltrúa, og um leið hvort hann sé í vasanum á Samherja,“ segir Dóra Björt Guðjónsdóttir, borgarfulltrúi Pírata, í aðsendri grein í Fréttablaðinuí dag.
Dóra skrifar þar um Eyþór Arnalds, oddvita Sjálfstæðismanna í borgarstjórn, og útgerðarrisann Samherja.
Dóra segist hafa kallað eftir því að Eyþór gerði heiðarlega grein fyrir sínu sambandi og samskiptum við Samherja. „Sérstaklega eftir að sýnt var fram á að Eyþór hafi tengsl við fyrirtæki sem Samherji notar til að múta stjórnmálafólki um allan heim. Einfaldar spurningar sem hann hefur aldrei svarað til fulls. Oddviti Sjálfstæðisflokksins í stærsta sveitarfélagi landsins hefur hingað til komist upp með að fá gefnar hundruð milljóna frá Samherja.“
Dóra segir að í stað þess að svara hafi Eyþór ákveðið að draga hana fyrir forsætisnefnd vegna meintra brota á siðareglum. „Þetta er þekkt aðferð hjá Sjálfstæðisflokknum og hans bakhjörlum; að grafa undan, smætta og jaðarsetja þá sem setja þeim eðlileg mörk. Aðför Samherja að fjölmiðlafrelsinu þar sem fjölmiðlamaðurinn Helgi Seljan er tekinn fyrir er ágætis dæmi um aðferðirnar. Í því máli liggja þræðir beinustu leið til Valhallar.“
Dóra segir svo að síðasta útspil Samherja í leit sinni að tilfallandi afvegaleiðingu snúist um hvort gagnið sem gagnrýni fjölmiðlamannsins byggist á kallist „skýrsla“ eða „vinnuskjal“. Um sé að ræða bjánalegan útúrsnúning. Merkjum okkur að staðfest hefur verið að plaggið er til sem þýðir að upphafleg vörn Samherja um að gagnrýnin byggi á uppspuna hélt ekki vatni.“
Dóra bendir svo á að Kristján Þór Júlíusson, fyrrverandi stjórnarformaður Samherja og náinn vinur forstjóra fyrirtækisins, sé enn sjávarútvegsráðherra „þrátt fyrir að staðfest sé að hann var notaður sem leikmunur á hákarlafundi. Þorsteinn Már kynnti Kristján sem „sinn mann“ í ríkisstjórn.“
Hún endar grein sína á þeim orðum að enn sleppi oddviti Sjálfstæðisflokksins í Reykjavík, Eyþór Arnalds, við að svara fyrir himinháar upphæðir frá Samherja í gegnum Kýpurfyrirtæki sem „notað er til að múta stjórnmálamönnum“ víða um heim.
„Enn stundar fyrirtækið linnulausa áróðursherferð gegn siðferðisvitund okkar allra í stað þess að koma heiðarlega fram. Þeir standa jú alltaf saman, samherjarnir.“
