Dóra Jóhannsdóttir, leikari, leikstjóri og handritshöfundur, fagnar því í dag að þrjú ár eru liðin síðan hún varð edrú. Dóra segir í einlægri færslu á Facebook-síðu sinni að enginn óski sér að vera með fíknisjúkdóm og fyrir þremur árum hafi hún verið orðin mjög veik.
Dóra segir að vinkona hennar hafi minnt hana nýlega á eitt sem hún sagði á þessum degi fyrir þremur árum, buguð og brotin á leið í fimmtu meðferðina. Sagði Dóra að hana dreymdi um að leikstýra Skaupinu einn daginn. Óhætt er að segja að sá draumur hafi ræst og jafnvel rúmlega það.
„Ég veit það fyrir víst að ég hefði aldrei getað uppfyllt þann draum ef ég hefði ekki náð að verða edrú,“ segir Dóra en Skaupið í lok síðasta árs féll sérstaklega vel í kramið hjá landsmönnum og var eitt það allra besta í áraraðir. Dóra fer svo yfir þau atriði sem hafa hjálpað henni á þessari vegferð.
„Ég er í bata í dag og þetta er m.a það sem hefur hjálpað mér og vinnur allt saman: 12 spora samtök eru með ókeypis stórkostleg prógröm fyrir alla sem díla við einhverskonar fíknir eða meðvirkni. SÁÁ, Vogur og Vík gerðu mikið fyrir mig og loks meðferðin í Svíþjóð, sem er því miður búið að loka. Eftir það fór ég í endurhæfingu sem var mér nauðsynlegt enda skilur neysla mann eftir með mjög laskað taugakerfi. Ég hef eytt formúgu í sálfræðiþjónustu sem er ekki á allra færi, því miður, en er nauðsynlegt fyrir mig til að vinna úr áföllum.“
Dóra segist í færslu sinni í dag sjá skýr tengsl milli áfallastreitu, meðvirkni, athyglisbrests og fíknisjúkdóma.
„Lykillinn að bata mínum í dag er að fylgja innsæinu, biðja um hjálp, hlusta á þarfir mínar, vera með skýr mörk og sjálfsvirði sem ég set ekki í hendur annarra og nærandi tenging við annað fólk. Ég finn fyrir gríðarlegu þakklæti og hlakka til að halda áfram að vera edrú og fá að upplifa skýrt þetta fáránlega fyndna, fallega og sorglega ferðalag sem lífið er. Ég vona að ég fái að halda áfram að vaxa og þroskast og vera í ljósi og sannleika og geti verið til staðar fyrir aðra.“
