Dóra Björt Guðjónsdóttir, borgarfulltrúi Pírata, blandar sér í umræðuna um klámáhorf meðal ungra drengja í færslu á Twitter síðu sinni í gær. Tilefnið var umræða þess efnis í Silfri gærdagsins á RÚV.
Í þættinum var settur fókus á drengi og unga menn í samhengi við kynbundið ofbeldi. „Þetta er kynslóðin sem á að vera betri en eldri kynslóðir karlmanna,“ segir Einar Þorsteinsson, nýr umsjónarmaður Silfursins. Er hann kominn í stað Fanneyjar Birnu Jónsdóttur, sem nokkuð fjaðrafok var í kringum síðustu vikur hennar í starfi.
Rætt var við Maríu Rún Bjarnadóttur, lögfræðing hjá Ríkislögreglustjóra, og Þórð Kristinsson, mannfræðing og doktorsnema, í þættinum. Þau þekkja vel til þessara mála.
Dóra Björt vill skaðaminnkandi nálgun í klámáhorfi ungra drengja: „Vantar ekki bara skaðaminnkandi nálgun á klám? 40% drengja í 8.-10. bekk horfa á klám sem er heimsmet, algengt að það sé mjög hart jaðarklám, skv umfjöllun í Silfrinu. Bann gegn klámi hefur ekki virkað, þvert á móti. Við þurfum nýja upplýsandi og fordómalausa nálgun.“
Nokkur fjöldi notenda tekur undir með Dóru, en hátt í 130 manns líkar við færsluna. Þá svarar Sandra nokkur Jóhannsdóttir henni og segir fræðslu vera lykilatriðið í þessu máli: „Fræðsla er númer 1,2 og 3. Svo held ég að það þurfi aukningu og sýnileika á klámi sem sýnir heilbrigt kynlíf sem caterar ekki bara körlum. Klám er aldrei að fara að hætta en við þurfum að breyta bæði viðhorfi og í hvaða ljósi það er sýnt.“
Hans Jónsson, frambjóðandi á lista Pírata í Norðausturkjördæmi fyrir síðustu Alþingiskosningar og trans-akvítisti, tekur undir sjónarmið Söndru: „Fræðsla. Sérstaklega fræðsla og þjálfun í samþykki sem hefst strax á leikskólanum. Það mun ekki nauðsynlega koma í veg fyrir allt klámáhorf en það breytir nálgunum og skilningi.“
Vantar ekki bara skaðaminnkandi nálgun á klám? 40% drengja í 8.-10. bekk horfa á klám sem er heimsmet, algengt að það sé mjög hart jaðarklám, skv umfjöllun í Silfrinu. Bann gegn klámi hefur ekki virkað, þvert á móti. Við þurfum nýja upplýsandi og fordómalausa nálgun. #Silfrið
— Dóra Björt (@DoraBjort) October 24, 2021
