„Hamraborgin er örugglega eitt stærsta dópsölumarkaðssvæði landsins,“ segir maður sem rekur fyrirtæki í Hamraborg í Kópavogi en íbúar og fyrirtækjaeigendur á svæðinu hafa áhyggjur af fíkniefnaviðskiptum sem fara fram á bílastæðum á svæðinu.
Fréttablaðið fjallar um málið í dag. Rætt er við Benjamín Magnússon arkitekt sem segir: „Okkur sýnist vera þarna blómleg viðskipti.“
Fjallað var um málið á samráðsfundi um skipulagsmál í Hamraborg á dögunum en þar viðruðu fundarmenn áhyggjur sínar af glæpastarfsemi á svæðinu. Vildu fundarmenn að sett væri upp myndavélaeftirlit í þeirri von að fæla einstaklinga frá því að stunda vafasöm viðskipti á svæðinu.
Benjamín sat umræddan fund og segir hann við Fréttablaðið að vandamálið sé ekki nýtt af nálinni. Þannig hitti hann fulltrúa þáverandi meirihluta bæjarstjórnar Kópavogs fyrir fimm árum þar sem hann lýsti áhyggjum sínum. Stakk hann upp á því að myndavélum yrði komið fyrir en síðan þá hefur ekkert gerst.
„Maður sér að það kemur einn bíll og bíður og svo kemur enn flottari bíll og það eru opnaðir gluggar og eitthvað gengur á milli áður en farið er hvort í sína áttina,“ segir hann um dæmigerð viðskipti á svæðinu.
Fyrirtækjaeigandinn sem vísað er til hér í byrjun fréttarinnar segist næstum daglega verða vitni að því að dópsalar mæti á svæðið með umslög fyrir viðskiptavini. Segir hann að börn allt niður í tólf ára séu að sprauta sig í bílageymslum á svæðinu.
