Diljá Mist Einarsdóttir, þingmaður Sjálfstæðisflokksins, hrósar ungum sjálfstæðismönnum fyrir mótmælin við rússneska sendiráðið.
Í gærkvöldi hafði fjölmennt lögreglulið afskipti af átta ungum Sjálfstæðismönnum sem hugðust mála úkraínska fánann á götuna fyrir framan rússenska sendiráðið og minna þar með á stríðið í Úkraínu sem hefur staðið í hálft ár. Þar á meðal var sérsveitin við sendiráðið.
Steinar Ingi Kolbeins, varaformaður Sambands ungra sjálfstæðismanna, sagði í samtali við mbl.is í gær að ætlun hópsins væri að minna á voðaverk Rússa í nágrannalandi sínu.
Ekki náði verkið þó langt og varð aðeins einn gulur og annar blár pollur á gangstéttinni þar sem fjölmennt lið lögreglu stöðvaði mótmælin.
„Vel gert hjá ungum sjálfstæðismönnum að vekja athygli á því að hálft ár er liðið frá innrás Pútíns í Úkraínu. Ég hvet alla til að mæta á málþing sem SUS stendur fyrir til þess að minna á Úkraínu,“ skrifar Diljá.
„Frásögn þeirra af viðbúnaði lögreglu og sérsveitar við rússneska sendiráðið vekur hins vegar upp spurningar um hvort um eðlilega vernd og verklag sé að ræða. Ungum sjálfstæðismönnum tókst ekki að hafa uppi eðlileg mótmæli með því að skreyta götu við sendiráðið með úkraínsku fánalitunum þar sem lögregla stöðvaði þá áður en þeir gátu svo mikið sem mundað pensil. E.t.v. taldi lögreglan sér ekki annað fært, verandi á staðnum og með þennan líka viðbúnað. Það er synd, það hefði verið sómi að fánaskreytingunni á þessum stað,“ skrifar Diljá enn fremur.
