William Hanson, sérfræðingur í mannasiðum, fer yfir það í frétt mbl.ishvort það sé dónalegt að taka frá sólbekki þegar fólk er á sólarströnd erlendis.
Oft á tíðum er samkeppni um bekkina og eru afar skiptar skoðanir um hverjar reglurnar séu hvað sólbekkina varðar.
„Það er í lagi að taka frá sólbekk með handklæði sínu ef maður ætlar ekki að vera lengur í burtu en hálftíma. Þú þarft kannski að fá þér morgunmat eða hádegismat og verður varla lengur en í 30 mínútur. Þá er í lagi að taka frá. En ef þú ætlar að vera í klukkutíma eða lengur til að fara í nudd eða eitthvað slíkt þá þarf maður að gefa sólbekkinn upp á bátinn,“ segir Hanson.
Hann bætir við að það sé mjög óvinsælt að einoka sólbekkinn allan daginn.
Laura Akano, sem einnig er sérfræðingur í mannasiðum, er ósammála Hanson. Hún segir að fólk hafi engan rétt á að taka frá sólbekki.
„Fyrstur kemur, fyrstur fær. Svo einfalt er það ef hótelið er ekki með bókunarkerfi fyrir sólbekki. Eina rétta leiðin til þess að taka frá sólbekki er í gegnum formlegt bókunarkerfi. Fólk á ekki að vera að einoka sólbekki allan daginn. Það er ókurteisi, sérstaklega á sameiginlegum svæðum þar sem fólk þarf að deila.“
Akano bætir við að hún yrði ekki hissa ef fólk fjarlægði handklæði sem notar ekki sólbekkina í langan tíma.
„Ef þú ferð í burtu ætti einhver annar að geta notað bekkinn og ekki vera hissa ef einhver tekur handklæðið og kastar því til hliðar.“
Bæði eru þó sammála um að staðan sé önnur ef fólk hefur leigt eða greitt fyrir sólbekkina.
