„Það umboð sem Ragnar Þór Ingólfsson fékk fyrir helgi dugar honum vissulega til að leiða VR áfram, en það getur engan veginn verið réttlæting þess að beita VR í pólitískum tilgangi, jafnvel gegn sjónarmiðum stórs hluta félagsins.“
Svo segir í leiðara Morgunblaðsins í dag en leiða má líkum að því að þar haldi sjálfur Davíð Oddsson, ritstjóri blaðsins, á penna.
Eins og kunnugt er hafði Ragnar Þór betur gegn Helgu Guðrúnu Jónasdóttur, mótframbjóðanda sínum í formannskjöri VR, á dögunum. Ragnar hlaut nokkuð góða kosningu, eða 63% atkvæða.
„Formaður VR vann með nokkrum yfirburðum í formannskjöri sem lauk fyrir helgi. Þar sýndi sig enn og aftur að sitjandi formaður nýtur drjúgs forskots og að mótframbjóðandi á jafnan á brattann að sækja. En þegar betur er að gáð ættu úrslitin að vera formanninum umhugsunarefni,“ segir í leiðara Morgunblaðsins og bent á að það 36 þúsund félagar hafi verið á kjörskrá en af þeim aðeins sex þúsund kosið formanninn.
„Kosningaþátttaka var tæp 29%, sem sýnir mikið áhugaleysi félagsmanna um starfsemi félagsins. Þetta er umhugsunarvert, ekki síst í ljósi þess hve ríka tilhneigingu forysta þessa verkalýðsfélags – og hið sama á raunar við um sum önnur – hefur til að blanda sér almennt inn í þjóðmálaumræðu og pólitíska baráttu.“
Þess má geta að þrátt fyrir þetta meinta áhugaleysi félagsmanna var þátttakan í atkvæðagreiðslunni sú mesta í sögu félagsins.
