„Ég vissi ekkert hvaða maður þetta var og spurði sjálfan mig í sífellu í fyrstu hvað væri eiginlega málið með hann að mæta og horfa á nánast aðra hverja æfingu eða svo,“ segir Davíð Már Kristinsson, þjálfari, leikari og pistlahöfundur.
Davíð skrifaði færslu um helgina í stuðningshóp Guðna Th. Jóhannessonar, forseta Íslands, en eins og kunnugt er mun Guðni berjast við Guðmund Franklín Jónsson um embætti forseta í forsetakosningunum síðar í mánuðinum.
Færsla Davíðs vakti talsverða athygli en þar segir hann skemmtilega sögu af samskiptum hans og Guðna þegar Davíð þjálfaði son hans fyrir 6-7 árum síðan.
„Þetta voru 8-9 ára gamlir drengir. Æfingar voru 3x í viku, mjög snemma dags, eða um 2 leytið. Í hópnum voru um 30 drengir. Eiginlega enginn foreldri kom að horfa á æfingar þennan vetur. Enda æfingar frekar snemma dags og fólk í vinnu. Það var þó einn maður sem mætti að horfa á fjölmargar æfingar allan veturinn, það var Guðni Th.,“ segir Davíð í færslunni og bætir við að hann hafi á þessum tíma ekkert vitað um manninn, enda Guðni á þessum tíma lektor í sagnfræði við Háskóla Íslands.
„Fyrir hverja og eftir hverja æfingu sem hann mætti á gaf hann sig á spjall við mig og oft ætlaði það spjall aldrei að enda. Maður þurfti ekki að vera mjög næmur á mannsálina og mikill mannþekkjari til að sjá og skynja að þarna fór góður maður á ferð með góða sál,“ segir Davíð og bætir við að í þrjú skipti þennan vetur hafi aðstoðarþjálfarinn afboðað sig með skömmum fyrirvara.
Guðni var ekki lengi að bjóða fram aðstoð sína þegar hann sá að Davíð var einn. „Tók hann frumkvæði og gekk í hlutverk þjálfara þarna á örstundu. Ávarpaði hann strax alla drengina með nafni og gaf skýrar skipanir. Það var eins og hann hefði aldrei gert neitt annað enda ekki langt að sækja þjálfunar, kennara og stjórnunar hæfileikana frá föður sínum heitnum Jóhannesi Sæmundssyni.“
Davíð segir að vonandi beri þjóðin gæfu til að kjósa Guðna til áframhaldandi setu á Bessastöðum, vonandi næstu átta árin að minnsta kosti. „Betri leiðtoga þjóðarinnar gætum við ekki haft. Hann hefur allt það sem þarf til að sæma góðan forseta og þjóðarleiðtoga.“
