Davíð Oddsson, ritstjóri Morgunblaðsins og fyrrverandi forsætisráðherra, er skólabókardæmi um einstakling sem ofmetur eigin getu. Þetta kemur fram í nýrri bók sálfræðiprófessorsins Adam Grant, Think Again, sem rauk beint í efsta sæti vinsældalista New York Times í síðasta mánuði.
Viðskiptablaðið fjallaði um þetta á dögunum.
Í umfjölluninni kemur fram að einn kafli sé tileinkaður forsetakosningunum hér á landi árið 2016 og þá sérstaklega þeim Davíð og Höllu Tómasdóttur sem var einnig í framboði. Er Davíð nefndur sem dæmi um einstakling sem ofmetur eigin getu en Halla sem dæmi um einstakling sem vanmetur eigin getu.
Eftirspurn eftir Davíð reyndist ekki mikil í kosningunum 2016. Hann hlaut 13,7% atkvæða, færri atkæði en Andri Snær Magnason (14,3%), Halla Tómasdóttir (27,9%) og Guðni Th. Jóhannesson (39,1%) sem hlaut langflest atkvæði.
Í bókinni er framboð Davíðs sett í samhengi við hin svokölluðu Dunning-Kruger-áhrif þar sem fólk ýmist ofmetur eða vanmetur eigin getu. Samkvæmt kenningunni stafar þetta ranga mat af bjagaðri sjálfsmynd fólks.
Bent er á að Davíð hafi verið á lista Time-tímaritsins yfir sökudólga efnahagshrunsins árið 2008 á heimsvísu. Undir hans stjórn hafi bankakerfið vaxið gríðarlega og í forsætisráðherratíð hans hafi bankarnir verið einkavæddir. Í frétt Viðskiptablaðsins, sem má lesa í heild sinni hér, segir:
„Hroki Davíðs og ofmat á eigin getu hafi haft í för með sér að hann ofmat til muna möguleika sína á árangri í forsetakosningunum. Grant segir Davíð minna á leikstjórnandann úr hægindastólnum – þá sem horfi á íþróttir í sjónvarpinu og séu fullvissir um að þeir geti staðið sig betur en þjálfarinn á vellinum.“
