„Í raun er óbreytt ástand stærstu fréttirnar,“ segir Davíð Þorláksson, forstöðumaður samkeppnishæfnissviðs Samtaka atvinnulífsins, í bakþönkum Fréttablaðsins í dag.
Tilefni pistilsins er að í þessum mánuði var eitt ár liðið síðan þriðji orkupakkinn var samþykktur. Mikið vatn hefur runnið til sjávar síðan þá en Davíð bendir á að fyrir rúmu ári hafi sumir talað um eins og hér væru á ferðinni ein mestu afglöð síðari tíma. Skoðar Davíð af því tilefni hvað hefur breyst á því ári sem liðið er.
„Það er skemmst frá því að segja að nákvæmlega eins og ríkið, meginþorri sérfræðinga og hagsmunasamtök í atvinnulífinu héldu fram þá hefur lítið sem ekkert breyst. Raforkuverð hefur ekki rokið upp og Evrópusambandið er ekki byrjað að undirbúa lagningu sæstrengs hingað til lands þvert gegn vilja heimamanna,“ segir Davíð og bætir við að óbreytt ástand sé stærsta fréttin.
„Með því að innleiða pakkann uppfylltum við þjóðréttarlegar skuldbindingar okkar og stóðum vörð um stöðu okkar á Evrópska efnahagssvæðinu. EES er mikilvægasta samstarf sem við eigum aðild að. Með aðgangi að innri markaði Evrópu bætum við lífskjör allra landsmanna. Það hefur fært okkur margvíslegt viðskiptafrelsi á ýmsum sviðum.“
Davíð segir að einnig sé mikilvægt að orkumál verði áfram hluti af EES-samstarfinu. Í því sambandi megi til dæmis benda á hve nátengd orkumál eru loftslagsmálum. Það blasi við að engin ein þjóð muni leysa þau og fyrir Íslendinga sé nærtækast að vinna sem mest að lausn loftslagsvandans á vettvangi EES.
„Það er ágætt að hafa þetta í huga næst þegar fólk reynir að beita brögðum eins og þjóðrembu og hrakspám til að sporna gegn frjálsum viðskiptum og alþjóðlegu samstarfi. Sem betur fer rætast þær aldrei. Við erum alltaf betur sett með frjálsum viðskiptum og alþjóðlegu samstarfi.“
