Aðdáendur Reykjavíkurbréfs Morgunblaðsins urðu fyrir vonbrigðum um helgina þegar þeir opnuðu Moggann. Ekkert Reykjavíkurbréf var að finna í sunnudagsblaðinu en í skemmtilegum mola á síðu 11 í blaði dagsins í dag er málið útskýrt.
„Af tæknilegum ástæðum birtist ekkert Reykjavíkurbréf í sunnudagsblaði Morgunblaðsins. Skrifin vistuðust ekki og glötuðust og þar sem þetta kom seint í ljós var ekki unnt að gera annað en sleppa bréfinu. Áskrifendur eru beðnir velvirðingar á þessu.“
Davíð Oddsson, ritstjóri Morgunblaðsins og fyrrverandi forsætisráðherra, hefur jafnan haldið á penna þegar Reykjavíkurbréfið er annars vegar þó bréfin séu ekki merkt höfundi.
Twitter-notendur hafa skemmt sér konunglega yfir þessum mistökum og hefur Sóley Tómasdóttir, fyrrverandi borgarfulltrúi, verið áberandi.
„Ég sé aðstæðurnar ljóslifandi fyrir mér: Allskonar fólk í panikki í Hádegismóum að reyna að finna út úr málunum með Davíð gargandi á kantinum, öskureiðan út í tölvuna fyrir að gleypa skrifin,“ segir hún og veltir fyrir sér af hverju ástæðunni var lýst í smáatriðum fyrir lesendum.
„Hefði kannski bara verið nóg að segja af tæknilegum ástæðum og biðjast velvirðingar?“
Hanna Katrín Friðriksson, þingmaður Viðreisnar, treystir því að það komi tvö Reykjavíkurbréf milli jóla og nýárs.
„Fyrir ykkur sem lentuð líka í tilvistarkreppu. Það er ekkert að óttast, bara tæknilegir erfiðleikar. Ég treysti á tvö Rvkbréf um næstu helgi. Jafnvel fleiri ef bæta á skaðann.“
Ég sé aðstæðurnar ljóslifandi fyrir mér: Allskonar fólk í panikki í Hádegismóum að reyna að finna út úr málunum með Davíð gargandi á kantinum, öskureiðan út í tölvuna fyrir að gleypa skrifin. pic.twitter.com/fYnqCdMV9R
— Sóley Tómasdóttir (@soleytomasar) December 21, 2020
Fyrir ykkur sem lentuð líka í tilvistarkreppu. Það er ekkert að óttast, bara tæknilegir erfiðleikar.
— Hanna-Katrín (@HannaKataF) December 21, 2020
Ég treysti á tvö Rvkbréf um næstu helgi. Jafnvel fleiri ef bæta á skaðann. pic.twitter.com/1HbUQ0wbVp
