Dagur B. Eggertsson borgarstjóri vill tryggja félagslega blöndun íbúða á fleiri stöðum í Reykjavík. Þannig verði borgin að betri stað fyrir alla. Þetta sagði Dagur á kynningarfundi Reykjavíkurborgar um íbúðaruppbyggingar í Reykjavík fyrr í dag.
Lóða- og íbúðaskortur í Reykjavík hefur verið mikið í umræðunni síðustu daga og hafa margir aðilar blandað sér í umræðuna. Samtök iðnaðarins deila ekki sömu hugmyndum og borgarstjórnin um ástæður að baki lóðaskortinum.
Þá lét Vigdís Hauksdóttir Dag finna fyrir sér á Facebook í dag. Kallaði hún borgarstjórann sorglegan og sagði stefnu Reykjavíkurborgar í þéttingu byggðar „mannfjandsamlega.“
Dagur sagði í viðtali við Mbl.is að lóðaskortur í Reykjavík sé ekki tilkominn vegna fárra úthlutaðra lóða af borginni, heldur sökum þess að allir viðskiptabankarnir hefðu skrúfað fyrir fjármögnun til verktaka. Sömuleiðis hafi vaxtalækkanir Seðlabankans ýtt undir mikla eftirspurn íbúða og lóða.
Hann segir að borgin sé að tryggja félagslega blöndun inni á reitum sem eru á höndum einkaaðila: „Við erum að semja við þá um að ákveðið hlutfall á uppbyggingarreitum, líka þeim sem eru dýrir og glæsilegastir, verði þannig að félagsbústaðir hafi forkaupsrétt og það verði félagsleg blöndun,“ segir Dagur.
Þetta segist Dagur vera að gera til þess að passa að „við endum ekki uppi með ógeðslega leiðinleg hverfi fyrir ríkt fólk, sem er alltaf í útlöndum hvort eð er. Og síðan fyrir fátækt fólk þar sem er einhver ömurð, heldur blöndu.“
Hann segir að reynslan sýni fram á að það sé betra fyrir alla: „Skemmtilegri borg, miklu kraftmeiri og við höfum öll gott af samneyti hvert við annað.“
Dagur segir að gerðir hafi verið sambærilegir samningar upp á um það bil 4.000 íbúðir á síðustu fimm árum. Þá áætlar hann að Reykjavíkurborg úthluti 1.089 íbúðum á næsta ári. Þar af eru 330 íbúðir sem falla undir hagkvæm eða græn húsnæði, 312 íbúðir fyrir húsnæðisfélög og 447 almennar íbúðir.
Þá er búið að tilgreina rúmlega 10.000 lóðir undir íbúðareiningar til næstu tíu ára.
