Dagur B. Eggertsson borgarstjóri viðurkennir að hann tárist ekki oft í vinnunni. Hann átti þó erfitt með að hemja sig þegar starfsmenn framkvæmdadeildar borgarinnar sendu honum meðfylgjandi mynd í morgun.
„Tárast ekki oft í vinnunni - en ég komst við þegar framkvæmdadeildin sendi mér þessa mynd í morgun. Búið er að koma smáhýsum - sem ætluð eru heimilislausu fólki - fyrir í Gufunesi. Þetta húsnæði hefur verið uppnefnt "gámahúsnæði" sem er rangnefni. Þetta fyllir mig stolti,“ segir Dagur en myndina má sjá hér að neðan.
Í athugasemdum undir færslunni segir Dagur að uppsetning smáhýsanna hafi í sumum tilvikum tafist, meðal annars vegna andmæla úr viðkomandi nágrenni.
„Við þurfum að hafa kjark til að halda okkar striki þegar þjónusta við jaðarhópa er annars vegar en umburðarlyndi og þolinmæði til að mæta umræðu og áhyggjum. Við erum alls konar. Smáhýsin eru hluti af nýrri nálgun sem við köllum Húsnæði fyrst og felur í sér að gera ekki stranga kröfu um edrúmennsku eða bata heldur tryggja húsnæði og aðstæður sem gera fólki í erfiðri stöðu kleift að ná bata. Stefnan byggir á virðingu og trú á fólki og hefur reynst vel.“
Dagur segir að endingu að smáhýsin verði alls 25 talsins og dreifast þau um alla borg.
Tárast ekki oft í vinnunni - en ég komst við þegar framkvæmdadeildin sendi mér þessa mynd í morgun. Búið er að koma smáhýsum - sem ætluð eru heimilislausu fólki - fyrir í Gufunesi. Þetta húsnæði hefur verið uppnefnt "gámahúsnæði" sem er rangnefni. Þetta fyllir mig stolti! pic.twitter.com/weX74AnLQg
— [email protected] (@Dagurb) December 3, 2020
