Dagur B. Eggertsson borgarstjóri Reykjavíkur segir að hann hafi gert stór mistök þegar hann sendi harðort bréf á Katrínu Jakobsdóttur forsætisráðherra og Sigurð Inga Jóhannsson, formann Framsóknarflokksins. Þetta kemur fram í nýrri bók Dags, Nýja Reykjavík, sem fjallað er um á vef Kjarnans.
Dagur segir að hann hafi frétt að ekkert fé ætti að renna til Borgarlínu í samgönguáætlun 2018. Til að bregðast við því sendi hann langan harðorðan tölvupóst. Hann sagði að alvarlegast væri að Borgarlína væri ekki fjármögnuð, eina sem væri fjármagnað væri undirbúningur.
„Ég lagði áherslu á tvennt: að samkvæmt greiningum SSH og Vegagerðarinnar héldi tafatíminn í umferðinni áfram að lengjast og versna ef Borgarlína yrði ekki að veruleika. Hitt atriðið þótt mér ekki veigaminna, að fótunum yrði kippt undan samgönguhluta loftslagsáætlunar stjórnvalda ef þetta færi óbreytt í gegn.“
Hann fór svo fram á fund. „Á honum varð mér ljóst að ég hafði gert stór mistök. Með póstinum hafði ég sent viðhengi, ítarlega greiningu á stöðunni að mati borgarinnar. Þar var hins vegar ekki aðeins að finna þær samgöngugreiningar sem sérfræðingar SSH höfðu gert til að styrkja okkar málflutning heldur einnig mat á samningsstöðu ríkis og sveitarfélaga. Meðal annars var þarna mat á pólitískri hættu í málinu fyrir Katrínu og VG vegna loftslagsmála sem ég taldi að gæti leitt til slita á ríkisstjórninni.“
