„Dánarfregnir morgunsins báru með sér að heiðursmaðurinn Helgi Ásgeirsson er látinn. Ég get ekki sagt að við höfum þekkst vel en það fylgdi því hlýja og angurværð að rekast á þá Þórólf Árnason á göngu þeirra um miðborgina og Þingholtin. Þeir gengu sannarlega í hægðum sínum - fet fyrir fet, hægt en örugglega - á leið sinni til systranna í Þingholtsstræti þar sem þeir drukku kaffið, í búðina eða heim,“ skrifar Dagur B. Eggertsson borgarstjóri Reykjavíkur á facebook í dag.
„Ég skeiðaði oftar en ekki framúr þeim í erli dagsins en ósjaldan skiptumst við á kveðjum eða fáeinum orðum. "Nei, sæll Dagur minn. Þarna ert þú. Ég vona að þú njótir dagsins." Þessi ljósbláu augu og bjarta rödd.“
„Ég á eftir að sakna Helga og borgin er fátækari af svipsterkum og ljúfum manni, og þeirri friðsæld og góða anda sem fylgdi því að sjá þá félaga fylgjast svo fallega að. Blessuð sé minning Helga Ásgeirssonar. Þórólfi færi ég mínar innilegustu samúðarkveðjur og öðrum vinum og aðstandendum,“ skrifar Dagur að lokum og birtir mynd sem Baldur Kristjánsson ljósmyndari tók af Helga og Þórólfi.
