Dagur B. Eggertsson borgarstjóri segir að Bjarni Benediktsson fjármálaráðherra hafi viðurkennt fyrir sér að hann hefði ekki verið viss um að koma Borgarlínuverkefninu í gegnum þingflokk Sjálfstæðisflokksins.
Hann segir í bókinni Nýja Reykjavík, sem fjallað er um á vef Kjarnans, að það hafi komið babb í bátinn við vinnslu samgöngusáttamálans árið 2019 þegar áformin voru kynnt þingflokki Sjálfstæðisflokksins. „Hann sagði okkur að hann væri ekki viss um að hann kæmi þessu í gegnum þingflokkinn. Ég mat það við hann að vera svona hreinskilinn. Hann varð að fá fram breytingar á plagginu,“ segir Dagur.
Þingmennirnir hafi viljað fá Sundabraut inn í sáttmálann líka, við því hafi orðið fyrir utan að fjármögnunin væri ekki tryggð. Dagur segir að hann beri virðingu fyrir því að Bjarni hafi tekið slaginn við eigið fólk. „Með því sýndi hann ótvíræða leiðtogahæfileika og tókst að halda dyrum flokksins í borginni opnum fyrir grænni framtíð. Umskipti í viðhorfum, framtíðarsýn og nýtt fólk í borgarstjórnarflokknum er í mínum huga forsenda þess að Sjálfstæðisflokkurinn verði stjórntækur í meirihlutasamstarf í borginni í náinni framtíð.“
Dagur er einnig hrifinn af Hildi Björnsdóttur, sem hefur skorað Eyþór Arnalds á hólm í Sjálfstæðisflokknum í borginni og vísar í grein hennar um samgöngumál. „Með þessari öflugu grein gerði Hildur algjörlega ljóst hvar hún stendur í afstöðunni til stærstu spurninganna um samgöngumál og þróun borgarinnar og kallaði eftir hugrekki til breytinga.“
