Dagþór ósáttur við lengsta frí lífs síns: „Ég vildi ekki þetta frí, þetta frí er þvingað frí“

„Núna er ég bú­inn að vera í lengsta fríi lífs míns eða í þrjá mánuði,“ segir Dagþór S. Haraldsson, leiðsögumaður með erlenda ferðamenn, í aðsendri grein sem birtist í Morgunblaðinu í dag.

Grein sína skrifa Dagþór í byrjun marsmánaðar en þá hafði hann ekkert unnið síðan 12. desember síðastliðinn.

„Sjálfsagt myndu marg­ir segja að ég ætti þetta langa frí skilið eft­ir að hafa verið á vinnu­markaði síðan ég var ung­ling­ur en karl­inn á núna stutt í 73 árin. Ég vildi ekki þetta frí, þetta frí er þvingað frí,“ segir Dagþór og bætir við að ástæðan sé fáránlegar reglur gagnvart eldri borgurum sem vilja og geta unnið.

Dagþór rifjar upp að ráðherrarnir Will­um Þór Þórsson og Guðmund­ur Ingi Guðbrandsson hafi brugðið á leik þann 5. desember síðastliðinn þegar þeir voru með glæru­sýn­ingu á Hót­el Hilton þar sem boðskap­ur­inn var „gott að eld­ast“.

„Mark­mið þeirra eru: Að auka lífs­gæði, bæta heilsu og auka virkni! Þetta átti að ger­ast með „samþætt­ingu atriða“ og þessu ferli átti að ljúka eft­ir fjög­ur ár!“

Dagþór segist hafa sýnt fram á að sé unnið fyr­ir 500 þúsund um­fram leyfi­leg­ar 200 þúsund krónur á mánuði haldi elli­líf­eyr­isþeg­inn í hans dæmi eft­ir um það bil 20% af hinu aukna vinnu­fram­lagi.

„En til hins op­in­bera fara 190 þús. (skatt­ar) og elli­líf­eyr­isþeg­inn fær eng­an elli­líf­eyri leng­ur sem var 212 þúsund. Sem sé hag­ur líf­eyr­isþeg­ans batn­ar um 98 þúsund en hins op­in­bera um 402 þúsund. Það op­in­bera tek­ur í sinn sjóð 80% af mínu aukna vinnu­fram­lagi: Já, það er „gott að eld­ast“.“

Dagþór segir í grein sinni að eftir að hann fékk vit í hausinn hafi hann ákveðið að á næsta tekjuári, núna, vinni hann einungis fyrir 2,4 milljónum á ári.

„Þar með fæ ég aft­ur greidd­an elli­líf­eyri upp á 212 þús. á mánuði og borga ekki leng­ur 190 þús. í skatt af mínu aukna vinnu­fram­lagi. Hið op­in­bera tap­ar því 402 þús. á mánuði. Með því að hækka frí­tekju­mark at­vinnu­tekna upp í 700 þús. myndi hið op­in­bera fá 190 þús. í skatt­tekj­ur upp í greidd­an elli­líf­eyri. Hvert barna­skóla­barn myndi skilja þetta, en ekki hið op­in­bera. Mér, sem bý einn eft­ir makam­issi, er mjög nauðsyn­legt að fá að vera í vinnu og þar með í fé­lags­skap og vera virk­ur. En það er komið í veg fyr­ir það af hinu op­in­bera: Já, það er „gott að eld­ast“.“

Grein Dagþórs má lesa í heild sinni í Morgunblaðinu í dag.