Creditinfo ætlar að endurskoða hvaða fyrirtæki mega kaupa vottunina „framúrskarandi fyrirtæki“ eftir gagnrýni á að umdeild fyrirtæki á borð við Samherja og Init hafi fengið vottun.
Hrefna Ösp Sigfinnsdóttir, framkvæmdastjóri Creditinfo, segir í samtali við Kjarnann að það eigi að fjölga mælikvörðum að baki listanum, en fram til þessa hefur það aðeins snúið að bókhaldi. „Eins er til skoðunar hvort Creditinfo áskilji sér rétt til að fjarlægja fyrirtæki tímabundið af listanum ef uppi eru sérstök álitamál um framgöngu þeirra eða ef þau sæta rannsókn vegna spillingarmála,“ sagði hún.
Init hefur sætt gagnrýni vegna greiðslna frá lífeyrissjóðum, þá hefur Samherji verið mikið í fréttum síðustu tvö ár vegna meintra mútugreiðslna í Namibíu og rekstur skæruliðadeildar.
„Við höfum kosið að stíga varlega til jarðar í þeim efnum en gerum ráð fyrir að fyrir liggi ákvörðun í þeim efnum áður en kemur að útgáfu næsta lista Framúrskarandi fyrirtækja en mikilvægt er að vanda sig vel og er ekki hægt að byggja valið á umfjöllun í fjölmiðlum heldur þurfum við að hafa haldbærar upplýsingar um rannsókn opinberra aðila.“
