Búnir að fá nóg: „Af hverju þarf að telja inn í verslanir og af hverju er grímu­skylda?“

Þeim fjölgar sí­fellt sem kalla eftir vægari að­gerðum innan­lands í ljósi mikillar fækkunar kórónu­veiru­smita að undan­förnu. Hring­braut sagði í morgun frá því að Gunnar Smári Egils­son, stofnandi Sósíal­ista­flokksins, væri kominn með nóg af grímu­skyldunni.

„Hve­nær verður grímu­skyldan af­lögð og sam­komu­tak­markanir einnig? Er þetta ekki orðið gott,“ spurði Gunnar Smári.

Sjá einnig: Gunnar Smári kominn með nóg af grímu­skyldunni: „Er þetta ekki orðið gott?“

Jón Magnús­son, hæsta­réttar­lög­maður og fyrr­verandi þing­maður, blandar sér einnig í um­ræðuna en í færslu á heima­síðu sinni í morgun bendir hann á að síðast hafi greinst smit utan sótt­kvíar hér á landi þann 20. janúar síðast­liðinn.

„Eðli­legt er að spurt sé hvers­vegna þarf að beita sótt­varnar­að­gerðum innan­lands þegar engin er sóttin? Er af­sakan­legt að svipta fólk frelsi vegna sóttar sem geisar ekki í landinu? Af hverju þarf að telja inn í verslanir og af hverju er grímu­skylda. Já og af hverju er tveggja metra fjar­lægðar­regla og fólki bannað að horfa á í­þrótta­kapp­leiki nema í sjón­varpi. Hvers­vegna er fólki bannað að heim­sækja vini og ættingja á elli- og sjúkra­heimili og bannað að mæta í jarðar­farir án þess að það sé talið inn.“

Jón bendir á að ís­lenska þjóðin hafi tekið ó­trú­lega vel í þau til­mæli sem til hennar hefur verið beint varðandi sótt­varnir í Co­vidinu. Góðan árangur í bar­áttunni megi fyrst og fremst þakka á­byrgðar­kennd alls þorra lands­manna sem hafi gætt þess vel að hamla sem mest smitum vegna Co­vid.

„Nú eru liðnir 37 dagar án þess að smit hafi greinst í landinu utan sótt­kvíar. Yfir­völd hafa því engan rétt af sótt­varnar­á­stæðum eða öðrum til að tak­marka frelsi fólksins í landinu til að lifa lífi sínu með venju­legum og eðli­legum hætti. Við þessar að­stæður er það ekkert annað en á­byrgðar­leysi af ríkis­stjórninni að létta ekki af hömlum á frelsi fólksins í landinu til leika og starfa eins og var fyrir Co­vid með þeirri undan­tekningu þó, að gæta verður þess að smit berist ekki inn í landið.“

Jón bendir á að það kosti þjóð­fé­lagið mikið að skerða frelsi fólks en aug­ljóst sé að það sé auð­veldara að svipta fólk frelsi sínu en að koma því á aftur.

Kristinn Hrafns­son, rit­stjóri Wiki­leaks, kallaði svo eftir því á Face­book-síðu sinni í morgun að allar tak­markanir innan­lands yrðu felldar niður. „Þetta er orðið á­gætt,“ sagði hann.

„Er ekki næstum mánuður síðan það fannst virkt smit utan sótt­kvíar innan­lands? Það er búið að bólu­setja allra við­kvæmasta hópinn í efsta aldurs­þrepi. Varnir á landa­mærum hafa verið hertar. Eftir­lit með fólki í sótt­kví hefur verið aukið. Förum svo að huga að sumri á grund­velli meðal­hófs og heil­brigðrar skyn­semi. Helmingur þjóðarinnar verður full­bólu­settur í júní og fleiri komnir með vörn eftir að hafa fengið fyrri sprautu.

Bretar verða búnir að bólu­setja alla sína í lok júní. Á hvaða for­sendu ætlum við að setja skorður við frjáls ferða­lög þeirra til Ís­lands í sumar? Mæli með því að við blásum til cov-kveðju­há­tíðar,“ sagði Kristinn.