Tónlistarmaðurinn Bubbi Morthens er allt annað en sáttur með vilja meirihluta bæjarráðs Akureyrar sem vill láta skoða hvort áfengissala á skíðasvæðinu verði heimiluð til langframa.
„Hverjum dettur í hug slík fásvinna að bjóða börnum upp á þá áhættu að fólk sem hefur sett áfengi inn fyrir varir hvað þá drukknir einstaklingar séu í brekkunni?“ Spyr Bubbi í ummælum við frétt Fréttablaðsins um málið.
Þetta er algerlega sturluð hugmynd,“ segir Bubbi.
Skoðanir eru skiptar meðal bæjarbúa en beðið er umsagna. Heit umræða fer fram á samfélagsmiðlum eins og Fréttablaðið hefur fjallað um , þar sem Akureyringar eru ýmist með eða á móti.
Sóley Björk Stefánsdóttir, fulltrúi VG í bæjarráði, er eini fulltrúi ráðsins sem telur að áfengi eigi ekki að selja í Hlíðarfjalli. Hún sagði í viðtali við Fréttablaðið að „rosaleg fyllerí“ hefðu orðið í fjallinu þegar leyft var um tíma í fyrravetur að selja áfengi.
