Tónlistarmaðurinn Bubbi Morthens sendi landsmönnum áramótakveðju á Facebook í dag þar sem hann þakkar öllum fyrir stuðninginn á árinu sem er að líða.
„Þetta ár hefur verið mér gott á svo marga vegu. Nýtt heimilli á fallegum stað við fallega náttúru.Allt fólkið mitt við góða heilsu engin fengið veiruna ennþá. ný Plata kom út og ljóðabók. Lífið er alltaf núna maður gleymir því svo oft. Ég veit ekki hvernig komandi ár mun reynast okkur og verða, ég vona auðvitað það besta,“ skrifar Bubbi.
„Vorið er minn tími hefur alltaf verið ég er hlutlaus gagnvart vetrinum en mikið óska ég þess að lífið verði öllum milt og gott að plágan hverfi að frelsið komi til okkar aftur.Að tilveran verði líkust því sem við áttum við að venjast áður en veiran kom í bæinn,“ bætir hann við.
Hann segir lífið vera æðislegt og stórkostlegt. „fögnum hverjum andardrætti hverjum degi hverri mínútu. Takk fyrir stuðningin á árinu sem er að líða ást og friður til allra,“ skrifar hann að lokum áður en hann deilir laginu Gamlárskvöld sem hann gaf út árið 2019.
