„Ég byrjaði að reykja sex ára gamall og ég mökkreykti 1980. Það væri mjög ankannalegt að ætla að fara að ritskoða það með einhverjum hætti. Það er bara kjaftæði,“ segir tónlistarmaðurinn Bubbi Morthens í samtali við Morgunblaðið í dag.
Blaðið greinir frá því að sígaretta í munnviki Bubba á þekktri mynd hafi verið fjarlægð af nánast öllu markaðsefni söngleiksins Níu lífa. Söngleikurinn fjallar einmitt um ævi Bubba sem er í hópi vinsælustu tónlistarmanna Íslandssögunnar.
Pétur Rúnar Heimisson, markaðsstjóri Borgarleikhússins, staðfestir að leikhúsinu hafi borist kvartanir vegna myndarinnar og herma heimildir Morgunblaðsins að kæra hafi meira að segja borist. Pétur segir að raddir hafi komið fram um að sígarettan stuðlaði að reykingum og Borgarleikhúsið hafi ekki viljað fara gegn forvarnarstarfi gegn reykingum. Þess vegna var myndinni breytt.
Bubbi er ekki beint sáttur við þetta og veltir fyrir sér hvers konar þjóðfélagi við búum í.
„Við erum komin í þjóðfélag þar sem stóri bróðir er kominn yfir og allt um kring, hvort sem okkur líkar betur eða verr,“ segir Bubbi sem hætti að reykja árið 2005.
