Brynjar Níelsson og Jakob Bjarnar Gretarsson tókust á í Bítinu í Bylgjunni í morgun. Fréttablaðið gerir viðtalinu skil í ítarlegri frétt á vef blaðsins.
Brynjar segir fjölmiðla líkt og Fréttablaðið, Kjarnann, Stundina og Mannlíf drifna áfram af pólitískum hagsmunum. Þáttastjórnendur sneru upp á hendurnar á Brynjari í því skyni að fá hann til að nefna dæmi um fjölmiðla sem gera slíkt.
Sjá einnig: Jakob ósáttur út í Brynjar: „Ætti að vera fyrir neðan þína virðingu“
„Sumir fjölmiðlar eru bara stofnaðir í kringum einn mann, eitt agenda eða eitt sjónarmið,“ svaraði Brynjar og þegar þeir félagar ýttu á hann um svör við því hvaða fjölmiðil hann ætti við svaraði hann:
„Hver á einn nánast heilt fjölmiðlaveldi? Ég veit ekki einu sinni hvað fjölmiðlafyrirtækið heitir, hvað heitir það, Torg?“ spurði Brynjar og spurði Heimir þá hvort hann ætti við Fréttablaðið, sem er í eigu Torgs.
„Hann er að tala um Helga Magnússon, geri ég ráð fyrir,“ skaut Jakob inn í en Helgi er eigandi Torgs. „Já auðvitað er ég að tala um hann,“ svaraði Brynjar þá.
Nefndi Brynjar einnig Þórð Snæ Júlíusson, ritstjóra Kjarnans og síðar í viðtalinu nefndi hann Stundina og Mannlíf sem dæmi um miðla sem eru reknir í þessu skyni.
„Þannig blasir þetta við mér og örugglega mörgum öðrum. Að þarna eru menn bara í ákveðinni pólitík. Þetta snýst um að tala gegn einhverju, þetta snýst um að tala gegn fiskveiðikerfinu, þetta snýst um að tala gegn ákveðnum stjórnmálamönnum, þetta er alltaf sama fólkið, alltaf sömu sjónarmiðin. Ég segi: Af hverju stofnið þið ekki bara hagsmunablað? Af hverju eruð þið að þykjast vera einhver alvöru fjölmiðill? Þannig blasir þetta við mér, það er bara það sem ég er að segja.“
Brynjar nefndi ekki Moggann sem dæmi um slíkan miðil. „Ég er ekki að tala um Sýn, ég er ekki að tala um Moggann, eða svona alvöru fjölmiðla. Svo er fullt af alvöru fjölmiðlamönnum hjá RÚV líka.“
Umfjöllun Fréttablaðsins um málið í heild sinni.
