Sjónvarpsmaðurinn Gísli Marteinn Baldursson blandaði sér í rökræður Brynjar Níelssonar og Andra Snæs Magnasonar í gær og sakaði Brynjar um hræsni en þeir síðarnefndu hafa verið að deila um loftlagsmál síðastliðna daga.
Stjörnulögmaðurinn Sveinn Andri Sveinsson tók sig síðan til að hjólaði í Brynjar og minnti hann á að þjóðin hefði hafnað honum í kosningum.
Brynjar sem er staddur á Mallorca um þessar mundir hefur tekið sig til og ákveðið að svara þeim báðum í sama pistlinum.
„Sjónvarpsmaðurinn síkáti sendi mér pillu á miðli frjálslynda og víðsýna fólksins, sem einkum berst fyrir þöggun og útilokun þeirra sem eru ósammála þeim. Svona getur tilveran verið mótsagnakennd. Glaðlynda sjónvarpsmanninum finnst skrítið að ég hafi ýjað að fasískri hegðun rithöfundar úti í bæ, sem vildi að starfsmenn Moggans beittu þöggunar - og útilokunaraðgerðum vegna viðhorfs ritstjórans í loftslagsmálum, þar sem ég hafi greitt atkvæði gegn síðasta þungunarrofsfrumvarpi, vildi vísa 300 manns af landinu og nýja innflytjenda löggjöf og vildi þar að auki valdefla lögregluna,“ skrifar Brynjar á Facebook.
„Léttlyndi sjónvarpsmaðurinn áttar sig ekki á því frekar en rithöfundurinn úti í bæ að fasismi er fyrst og fremst hegðun en ekki það að einhver er ósammála manni. Skoðanir um þungunarrof hafa ekkert með fasisma að gera. Það er ekki fasísk skoðun að þegar fóstur er orðið að barni í móðurkviði hafi það einhvern rétt. Að vísa fólki úr landi sem hefur lögum samkvæmt ekki heimild til að vera er ekki fasismi eða breytingar á lögum um útlendinga í samræmi við lög í Evrópulöndum. Að veita lögreglu svipaðar heimildir og í öðrum löndum til að framfylgja lögum og koma í veg fyrir skipulagða glæpastarfsemi er ekki fasismi,“ heldur hann áfram.
Brynjar segir vissulega sé fasismi ekki bara hegðun og hugarfar.
„Til er fasísk hugmyndafræði sem tekur úr sambandi réttindi borgaranna gagnvart yfirvöldum. Við erum hins vegar með stjórnarskrá sem verndar þau réttindi. Við þurfum því ekki að hafa áhyggjur að því og áhyggjur mínar beinast að fasískri hegðun margra í frjálsa samfélaginu, einkum þeirra sem reyna að selja sig sem frjálslynda og víðsýna. Þar eru mest áberandi elítuliðið úr fjölmiðlum og lista-og menningargeiranum sem finnst það sjálfsögð réttindi að skattgreiðendur tryggi afkomu þeirra. Gott ef það eru ekki mannréttindi.“
„Ofurhressi sjónvarpsmaðurinn er ekki ólíkur stjörnulögmanninum eina sanna. Voru báðir virkir í Sjálfstæðisflokknum en þegar þeim var hafnað í prófkjöri brast út einhver heift sem bara magnast með árunum. Þeir urðu allt í einu svo gáfaðir og réttsýnir. Um það er hins vegar talsverður ágreiningur. Það er ljóst að við sjónvarpsmaðurinn hressi eigum bara eitt sameiginlegt en það er við erum alltaf jafn unglegir í útliti. Það sama verður ekki sagt um stjörnulögmanninn.
Það er mikið frelsi að geta fjasað ábyrgðarlaust í góða veðrinu í Miðjarðarhafi á launum frá skattgreiðendum meðan vinnulúnir rithöfundar og sjónvarpsmenn híma heima í kuldanum með kvíða yfir því að þeir muni stikna úr hita innan fárra ára,“ skrifar Brynjar að lokum.
