Brynjar Níelsson, aðstoðarmaður dómsmálaráðherra og varaþingmaður, skrifar um efnahagsástandi á Facebook- síðu sinni.
„Verðbólgan er nú komin í tveggja stafa tölu. Eins og alltaf er það öðrum að kenna en okkur sjálfum, helst seðlabankastjóra og fjármálaráðherra. Á fundi efnahags- og viðskiptanefndar með seðlabankastjóra birtist okkur fullkomin vanþekking þingmanna stjórnarandstöðunnar á efnahagsmálum. Því er ástæða til nokkurs hroka af minni hálfu,“ skrifar Brynjar.
Eins og Innherji greindi frá á dögunum spurði Ásthildur Lóa Þórsdóttir, þingmaður Flokk fólksins, ansi sérstakra spurninga á fundi nefndarinnar með seðlabankastjóra.
Hann bar undir hann kenningu sem stangast á við hagfræði, hagsöguna og almenna skynsemi að mati Innherja er hún spurði hvort að stýrivaxtahækkanir Seðlabanka Íslands væru ekki verðbólguhvetjandi í ljósi þess að fyrirtæki myndu velta auknum fjármagnskostnaði út í verðlagið.
Ásgeir benti á hið augljósa, þ.e.a.s. að stýrivextir væru helsta tæki seðlabanka og að þeim hefði verið beitt í tvö eða þrjú hundruð ár.
„Það er skýrt að hærri fjármagnskostnaður dregur úr fjárfestingu, dregur úr lántökum – það er það sem við erum að huga að – og kælir hagkerfið. Það þekkjast engin dæmi um að að stýrivextir hækki verðbólgu með þeim hætti sem hér er nefnt,“ sagði Ásgeir en Innherji greinir frá..
Brynjar hefur fengið sig fullsaddan á svona spurningum.
„Verðbólga eykst fyrr eða síðar þegar laun hækka meira en innistæða er fyrir. Laun hafa hækkað yfir tuttugu prósent frá því að kovíd lét á sér kræla og um sjötíu prósent á síðustu níu árum. Þessar launahækkanir eru óþekktar annars staðar í veröldinni,“ skrifar Brynjar.
„Að auki fylgdu kröfur um aukin útgjöld ríkissjóðs fyrir utan umtalsverðar launahækkanir til opinberra starfsmanna, einkum á sveitarstjórnarstiginu. Hvort tveggja hefur áhrif á verðbólgu sem öllum ætti að vera ljóst. Viðskiptahalli vegna eyðslu okkur hefur áhrif á verðbólguna og svo bætist við innflutt verðbólga sem var óhjákvæmileg vegna kovíd. Má því ætla að verðbólga ætti að vera enn meiri en raun er.“
„Verðbólga er mjög skaðleg. Þegar ég var að stofna fjölskyldu var verðbólga um og yfir hundrað prósent og þannig var ástandið í tuttugu ár. Verðbólgan nú kemur mest niður á lægst launuðum og ungu fólki sem hefur keypt sína fyrstu eign. Þá lamar það frekari uppbyggingu atvinnulífsins. Við náum engum tökum á verðbólgunni með óraunhæfum kröfum um launahækkun og auknum kröfum á frekari útgjöld ríkisins.
Lítum í eigin barm og lærum af reynslunni og hættum að djöflast í seðlabankastjóra sem eingöngu sinnir skyldum sínum,“ skrifar Brynjar að lokum.
