Brynjar Níelsson, aðstoðarmaður innanríkisráðherra og fyrrverandi þingmaður Sjálfstæðisflokksins, er ekki hættur á samfélagsmiðlum þó að hann sé hættur með lengri færslur um samfélagsmál á Facebook.
Eins og frægt er orðið tilkynnti Brynjar á dögunum að hann væri hættur á Facebook vegna nýja starfsins.
„Jæja, nú þarf ég að kveðja fésbókina tímabundið. Í nýju djobbi er ekki gert ráð fyrir ábyrgðarlausu glensi á samfélagsmiðlum,“ sagði Brynjar. Hann virðist þó enn kíkja af og til á Facebook og setja læk við einn og einn status.
Þá er hann ekki hættur á Twitter, þó að 19 dagar hafi liðið á milli tísta, en hann tísti í gær:
„Konan kvaddi mig í morgun með þeim orðum að hún hafi verið of fljót á sér. Ég veit ekkert hvað hún er að hugsa en ég þarf að nota bílinn.“
