Brynjar Níelsson segir blaðamenn sjálfhverfa og ótrúlega mikla aumingja. Þetta kom fram í Harmageddon í gær þar sem Brynjar var gestur og ræddi hina svokölluðu skæruliðadeild Samherja. Helga Vala Helgadóttir var einnig í þættinum.
Brynjar segir vinnubrögð skæruliðanna, sem Stundin og Kjarninn hafa meðal annars fjallað um, réttmæta vörn. „Þetta er fyrirtæki sem er djöflast á alla daga,“ segir Brynjar. Málið í heild sinni er nauðaómerkilegt að mati hans.
„Stóra málið og siðleysið í þessu er að vera birta einhver gögn, stolin gögn um skoðanir fólks sín á milli,“ segir Brynjar. Málið vekji einungis athygli vegna þess að það snýr að blaðamönnum. Hann segist ekki skilja þessa viðkvæmni í stéttinni.
„Það eru allir að beita sér í einhverju, en af því að þetta er Samherji og einhverjir blaðamenn þá fer allt á annan endann,“ segir hann. Gagnrýna megi blaðamenn með öllum hætti, þeir séu alltof viðkvæmir. Aðspurður segir hann að um eðlileg viðbrögð sé að ræða af hálfu Samherja:
„Ef ég tel blaðamanninn vera með óheiðarleg vinnubrögð, fara með rangindi, þá gagnrýni ég hann, þá fer ég bara beint í hann, hvað er að því?“
