Brynjar Níelsson, aðstoðarmaður dómsmálaráðherra, er ekki spor sáttur með pólitíska umræðu á Íslandi um þessar mundir.
„Halda má því fram með góðum rökum að pólitísk umræða hér á landi hafi aldrei verið jafn nöturleg og innihaldslaus og nú um stundir. Hún einkennist, sem aldrei fyrr, af upphrópunum, óðagoti og almennu þekkingarleysi,“ skrifar Brynjar.
„Menn standa með krepptan hnefa í ræðupúlti þingsins og saka aðra um valdarán fyrir það eitt að fara að lögum um ríkisborgararétt og stjórnsýslulegum um að gæta að jafnræði við afgreiðslu erinda hjá Útlendingastofnun. Menn eru sakaðir um að vilja koma á lögregluríki í viðleitni sinni að setja skýr viðmið og verklagsreglur fyrir lögreglu til að sinna lögboðinni skyldu sinni til að koma í veg fyrir afbrot og gæta öryggis borgaranna. Svo eru allir fasistar og útlendingahatarar sem telja ekki hjá því komist að koma einhverju skikki á þann málaflokk svo hægt sé að framkvæma lögin sem í gildi eru,“ bætir hann við.
Hann segir umræðuna sjaldnast vera um pólitíska sýn og hugmyndafræði heldur snýst hún um tortryggni og að skapa upplausn með því að draga undan stofnunum sem vera með mikilvægt og vandmeðfarið vald.
„Eru þar sumir flokkar meira áberandi en aðrir. Og ekki er hægt að treysta á að fjölmiðlar, sem trúa sjálfir að starfi fyrir almenning og jafnvel almættið, leiðrétti kúrsins og komi umræðunni í vitrænt horf þar sem fram fari málefnaleg umræða og gagnrýni. Þeir eru ýmist þátttakendur í öllu bixinu eða endurvarpa því gagnrýnislaust.“
„Þegar þessir menn hvíla sig örstutt á gífuryrðum detta þeir í almenna dyggðaskreytingu þar sem lofað eru öllu fyrir alla og auðvitað á kostnað annarra en þeirra sjálfra. Sjálfum finnst mér þeir skástir þegar þeir krefjast þess að fá uppáhaldsdrykki sína í mötuneyti þingsins. Málefnalegri verða þeir ekki.
Þessi færsla er ótengd heilsufarslegum áföllum mínum síðasta misserið ef einhverjir skyldu halda það,“ skrifar Brynjar að lokum.
