Brynjar og Björn Leví tókust á í Bítinu: „Þú verður að sýna ein­hverja hóf­semi“

Brynjar Níels­son, þing­maður Sjálf­stæðis­flokksins, og Björn Leví Gunnars­son, þing­maður Pírata, tókust á í Bítinu á Bylgjunni í morgun. Eins og fjallað hefur verið um í vikunni er Brynjar ekki sáttur fyrir fyrir­spurnar­gleði Björns Leví á þinginu. Lagði Brynjar fram fyrir­spurn þar sem hann vildi vita hver kostnaðurinn er við að svara fyrir­spurnum, meðal annars Pírötum og þá einna helst frá Birni Leví.

Björn Leví viður­kenndi fús­lega að hann væri dug­legur að leggja inn fyrir­spurnir en sagði þær allra hafa sinn til­gang. Í sumum til­fellum væri um að ræða sömu fyrir­spurnina til fjöl­margra stofnana og því væri fjöldinn nokkuð ýktur. Benti hann til dæmis á ný­lega fyrir­spurn um lög­bundin hlut­verk ráðu­neyta og stofnana hins opin­bera.

Vanur að spyrja gagnrýninna spurninga

Björn Leví sagðist nota svörin sem hann fær – þegar þau berast – í vinnunni í fjár­laga­nefnd og benti hann á að að­halds­kostnaður hefði komið út úr fyrir­spurnunum. Nefndi hann upp­lýsingar um aksturs­kostnað þing­manna máli sínu til stuðnings.

„Ég kem úr akademíu þar sem ég er vanur að spyrja gagn­rýninna spurninga. Ég er með eftir­lit með fram­kvæmda­valdinu og þegar ég fór inn í fjár­laga­nefnd fór ég að klóra mér í kollinum yfir gagn­sæi í opin­berum fjár­málum. Ef ég fæ ekki svör legg ég fram al­menna fyrir­spurn sem verður að svara,“ sagði Björn Leví sem bætti við að kosturinn við að leggja inn skrif­lega fyrir­spurn sé sá að hún lifir, ó­líkt öðrum fyrir­spurnum.

Komnir langt út fyrir allan ramma

Þegar Brynjar var spurður hvort þetta væru ekki góð og gild rök sagði hann svo ekki vera, þvert á móti. „Nei, talandi um fjár­laga­nefnd þá getur nefndin aflað þeirra upp­lýsinga sem hún þarf. Þetta er bara út í loftið, það er mikil­vægt að þing­menn geti lagt inn fyrir­spurnir, þegar þeir undir­búa mál eða þegar fyrir­spurnirnar hafa ein­hverja þýðingu. Hér erum við komnir langt út fyrir allan ramma,“ sagði Brynjar og nefndi sem dæmi fyrir­spurn Björns Leví um lög­bundið hlut­verk allra stofnana og ráðu­neyta.

„Þetta er ó­gjörningur og á­stæðan fyrir því að ég spyr um þetta er að þetta er orðið svo í­þyngjandi og kostnaðar­samt og hefur engan al­vöru til­gang í störfum þingsins,“ sagði Brynjar sem bætti við að af þessum á­stæðum hafi hann viljað vita kostnaðinn. „Ég hef heyrt það úr stjórnar­ráðinu að þetta er orðið margra manna starf að svara einum þing­manni,“ sagði Brynjar og bætti við að flestar þessara upp­lýsinga gætu menn náð í sjálfir eða fengið að­stoð frá upp­lýsinga­deild þingsins. „Þetta eru svo margir vinnu­tímar. Ég væri ekkert að spyrja ef ég hefði ekki heyrt úr stjórn­sýslunni að menn væru að kikna undan á­laginu,“ sagði Brynjar.

Sjáið fáránleikann

Björn Leví sagðist ekki beint hafa mikla sam­úð með fram­kvæmda­valdinu fyrir að svara fyrir störf sín. „Það er hlut­verk þeirra að út­skýra hvernig er farið með peningana,“ sagði hann og bætti við að fyrir­spurnirnar væru í raun ekki svo margar. Þær væru kannski þrjár til fjórar í mánuði að meðal­tali. „Er það mikið?“ spurði Björn Leví en Brynjar svaraði að það færi eftir því hver fyrir­spurnin væri.

Björn Leví benti á að margt gott hefði komið út úr fyrir­spurnum hans. Veturinn 2016/17 hafi hann til dæmis spurt um leigu­kostnað ríkisins vegna hús­næðis­mála. Bene­dikt Jóhannes­son, þá­verandi fjár­mála­ráð­herra, hefði tekið henni fagnandi og notað upp­lýsingarnar sem fengust.

Brynjar í­trekaði að þetta form, að óska eftir skrif­legum fyrir­spurnum, geti verið gagn­legt en ýjaði að því að þarna væri verið að mis­nota formið. „Ég skora á fólk að fara yfir þessar fyrir­spurnir. Það kann að vera að ein og ein sé í lagi en ef þið farið yfir allra þá sjáið þið fá­rán­leikann í þeim.“

Brynjar sagði svo þingmenn væru í löggjafarhlutverki en ekki í hlutverki rannsóknardómara. „Þú verður að sýna einhverja hófsemi,“ sagði hann.