Brynjar Níelsson, þingmaður Sjálfstæðisflokksins, og Björn Leví Gunnarsson, þingmaður Pírata, skiptust á skoðunum á Facebook-síðu þess fyrrnefnda í gær.
Brynjar gerði landsfund Samfylkingarinnar að umtalsefni þar sem hann sagði að fjölmiðlar hefðu verið undarlega áhugalitlir um fundinn.
„Hann var nefnilega stórmerkilegur af fleiri en einni ástæðu. Formaðurinn lýsti því yfir að hann ætli að bjóða kjósendum upp á skýran valkost um að færa meirihlutann í borginni inn í landsmálin og í raun útiloka aðra flokka í samstarf. Takk fyrir það, Logi.“
Björn Leví skrifaði athugasemd við færslu Brynjars og skaut létt á hann. Björn Leví sagði:
„Þetta væri kannski merkilegra hjá þér ef þú hefðir hugmynd um hvað "samstarf" þýðir. Það er ekki iðkað í samræmi við neina skilgreiningu orðsins á þingi í dag.“
Brynjar svaraði að bragði og sagðist ekki skilja fólk sem er svo upptekið af samstarfi að það útiloki fyrir fram aðra um samstarf. „Það er eitthvað bogið við þetta, Björn Leví.“
Björn Leví sagði að ríkisstjórnarsamstarf og málefnalegt samstarf væri tvennt ólíkt.
„Þið teljið ykkur kunna ríkisstjórnarsamstarf og það sé það eina sem skiptir máli. Þar á bak við er alls konar gíslataka mála og bolabrögð sem eiga ekkert sameiginlegt við samstarf. Málefnalegt samstarf er svo eitthvað sem virðist ekki vera í orðabókinni hjá ykkur.“
Færslu Brynjars má sjá hér að neðan:
Mér hefur fundist fjölmiðlar undarlega áhugalitlir um þennan landsfund Samfylkingarinnar. Hann var nefnilega...
Posted by Brynjar Níelsson on Sunnudagur, 8. nóvember 2020
