„Það er mjög fræðandi og mikil skemmtun að vera með mörgum konum á sjötugsaldri í útlöndum samfellt í marga daga. Miðaldra konur eru frábærar og mjög ólíkar mér. Þær hlusta þolinmóðar og klappa manni á kollinn eins og barni en maður skynjar samt fljótlega að maður ræður engu,“ skrifar Brynjar Níelsson, aðstoðarmaður dómsmálaráðherra á Facebook.
„En það er enginn skortur á drama þegar svona margar konur eru saman og mér líður stundum eins og ég sé fastur í raunveruleikaþætti á eyðieyju þar sem er engin undankomuleið. Maður verður smátt og smátt ein af konunum. Ég geng hér undir nafninu Binni Glee, sem mun vera þekktur áhrifavaldur og raunveruleikaþáttastjarna,“ bætir hann við.
Brynjar, sem er á Írlandi um þessar mundir segir hins vegar að dramað sé ekki eins magnað þar og hjá vini sínum Gunnari Smára.
„Sem er núna orðinn fórnarlamb hatursorðræðu. Hann rekur samt sjálfur síðu hér á fésbókinni sem er nánast ein samfelld hatursorðræða. Þetta hljómar eins og að síbrotamaður kvarti yfir því að einhver hafi stolið af honum einni krónu. Þegar ég var ungur og las gamla Þjóðviljann kvörtuðu sósíalistarnir gjarnan yfir hatursorðræðu þeirra sem bentu á hversu mikil ógn sósíalisminn væri við líf, heilsu og velferð fólks,“ skrifar Brynjar
„Ef það er einhver huggun fyrir Gunnar Smára þá hefur Bjarni Ben örugglega þurft að þola meiri hatursumræðu og hótanir en hann. Meira að segja ég þarf að þola margt í þessum efnum og ekki væli ég yfir því þótt ég væli oft. Að lokum vil ég segja við þig Gunnar Smári að sósíalisminn í dag verður ekkert skárri en sá gamli. Í hugmyndafræðinni er innbyggður fasismi eins og sagan kennir okkur. Þetta er gjaldþrota hugmyndafræði og hún færir engum réttlæti og velferð. Þú ert eins og bissnessmaður sem kaupir þrotabú og reynir að selja áfram ónýtu vöruna. Þú mátt kalla þennan sannleika hatursorðræðu mín vegna,“ skrifar Brynjar að lokum.
