Brynjar Níelsson hefur farið mikinn á samfélagsmiðlum undanfarið þar sem hann lýsir raunum sínum úr líkamsræktarsalnum – og auðvitað búningsklefanum. Frægar eru færslurnar hans um getnaðarlim sinn og skemmtilegum ummælum Bubba Morthens. Hann var vægast sagt áhugalaus um að sjá það allra heilagasta á Brynjari.
Þá greindi hann frá því fyrr í vikunni að hann hafi hrakið baðvörð úr vinnunni með færslum sínum. Hann baðst afsökunar á því í nýlegri færslu en inntak hans var einungis það að vekja athygli á hinni lokuðu umræðu um kynfæri karla: „Ég var bara að opna umræðuna um typpið, sem hefur verið hálfgert tabú og einkennst af neikvæðni og fordómum. Það má ekki einu sinni taka myndir af typpum, hvað þá deila þeim,“ sagði Brynjar eftirminnilega.
Það sem Brynjar vill þó greinilega helst er einfaldlega að tileinka sér betri lífstíl og ná líkamlegum árangri með því að mæta í líkamsræktina.
Það virðist þó ganga brösuglega, ef marka má færslur hans á Facebook undanfarin. Þar lýsti hann því meðal annars að hafa dottið af hlaupabrettinu í sinni fyrstu ferð í líkamsræktina í töluverðan tíma.
Þá hafa lyftingarnar ekki heldur farið vel með hann – raunar segist hann hafa bætt á sig kílóum vegna hávaðans sem stafar af óhljóðum þeirra sem stunda hvað þyngstar lyftingar í ræktarsalnum.
Greinilegt er að Brynjar er farinn að huga að öðrum og öllu óhefðbundnari valkostum þegar kemur að árangri í líkamsræktinni. Hann varpar upp spurningu í anda slagorðs Framsóknarflokksins á Twitter.
Gefum Brynjari orðið: „Þegar ég puða í ræktinni með takmörkuðum árangri hugsa ég stundum eins og framsóknarmaður. Er ekki bara best að taka stera?“
Afar fróðlegt verður að fylgjast með því hvort Brynjar láti slag standa og útvegi sér stera til þess að reyna að tóna sig til og ná árangri. Það yrði áhugavert framhald af raunum hans í líkamsræktinni.
Þegar ég puða í ræktinni með takmörkuðum árangri hugsa ég stundum eins og framsóknarmaður. Er ekki bara best að taka stera?
— Brynjar Níelsson (@BrynjarNielsson) October 29, 2021
