Brynjar Níelsson, þingmaður Sjálfstæðisflokksins, segir þá sem eru „rétthugsandi“ vera upptekna við að lýsa því yfir að þeir lesi ekki Morgunblaðið en hann segir nokkra slíka þó hafa keypt Morgunblað gærdagsins til þess að lesa viðtal við Katrínu Jakobsdóttur forsætisráðherra.
Hann segist hafa heimildir fyrir því að nokkrir hafi „laumast í skjóli myrkurs“ til þess að kaupa blaðið eða einfaldlega lesið blað nágrannans til að lesa viðtalið og „athuga hvort ofstækismaðurinn og fasistinn Sigmundur Davíð væri að skrifa eitthvað í blaðið sem gæti komið þeim úr jafnvægi.“
Að sögn Brynjars var viðtalið við Katrínu ágætt en að hún hafi „eðlilega“ gert lítið úr ágreiningi innan Vinstri grænna þar sem tveir úr ellefu manna þingflokki styddu ekki ríkisstjórnina. „Þetta væri ekki meiri ágreiningur en í öðrum flokkum og benti sérstaklega á "órólegu deildina" í Sjálfstæðisflokknum,“ segir Brynjar og bætir við að hann kannast við ýmsar deildir innan Sjálfstæðisflokksins en sú óreglulega hafi farið fram hjá honum.
„Til er ein deild sem má kalla "of rólegu deildina". Svo er auðvitað fýlupúkafélagið, þar sem færri komast að en vilja. Einnig er farin að myndast rétthugsunardeild og forréttindadeild þar eins og í öðrum flokkum,“ segir hann enn fremur.
„Menn geta haft ýmsar skoðanir á Mogganum og ég klóra mér sjálfur oft í hausnum þegar ég les mbl.is. En nú er samt svo komið að Mogginn er eiginlega eini alvöru fjölmiðillinn sem er í boði í dag. Það lesa hann allir, líka þeir sem eru uppteknir að því að láta vita að þeir geri það ekki. Ætti að leggja til skylduáskrift. Það er þekkt í okkar samfélagi að hafa skylduáskrift að fjölmiðli, með einum eða öðrum hætti.“
