Eins og minkur í hænsnabúi laumaðist Brynjar Níelsson, aðstoðarmaður dómsmálaráðherra, inn á umræðuvef Sósíalistaflokks Íslands
„Það er fátt skemmtilegra en að kíkja á umræðurnar á vef Sósíalistaflokksins. Skiptir ekki máli hvort félagarnir eru ungir eða reynslumiklir og hafa lifað tímanna tvenna, langskólagengnir eða ómenntaðir, allir eru þeir meira og minna úr tengslum við veruleikann. Svona hópur virkar á mann eins og sértrúarsöfnuður sem hefur gjörsamlega málað sig út í horn,“ skrifar Brynjar.
„Nú eru þeir mjög uppteknir af fátæktarumræðunni, sem er sérstakt því hvergi er minni fátækt að finna í heiminum en hér á landi. En fátækt er afar teygjanlegt hugtak og viðmiðanir breytast. Sósíalistar segja að fátækt sé mannanna verk en ekki náttúrulögmál. Þeir ættu að þekkja það best allra því þeir hafa undantekningarlaust náð að gera sín samfélög fátæk á mettíma.“
„Nú er það svo að við fæðumst öll allslaus og fátæk. Eina leiðin til að komast úr fátækt er að framleiða eitthvað til að selja öðrum. Það gerist ekki undir sósíalskri efnahagsstjórn. En það er ekki það versta við sósíalismann, heldur öll kúgunin sem óhjákvæmilega fylgir stjórnlyndinu og ofstækinu,“ skrifar Brynjar að lokum.
