„Mætti aldrei þessu vant í vinnuna í gær og tókst á í þingsal við þingmenn sem halda að það sé sérstakt jafnréttismál að jafn margir af hvoru kyni eigi sæti í stjórnum félaga,“ segir Brynjar Níelsson, þingmaður Sjálfstæðisflokksins.
Brynjar gerir þar frumvarp Lilju Rafneyjar Magnúsdóttur, þingkonu VG, að umtalsefni en samkvæmt því er lagt til að það varði dagsektum ef ekki er farið að ákvæðum laga um kynjahlutföll í stjórnum hlutafélaga. Dagsektirnar geta numið frá 10 þúsund krónum og upp í hundrað þúsund krónur, en samkvæmt frumvarpinu verður heimilt að taka tillit til fjárhagslegs styrkleika félags.
Brynjari þykir ekki mikið til frumvarpsins koma og segir að ef það nái fram að gangi verði hægt að ganga á eignarrétt manna til að tryggja að jafn margir af hvoru kyni eigi sæti í stjórnum félaga.
„Þessar kröfur eru uppi á sama tíma og verið er að reyna að gera samfélagið kynlaust. Jafnræðisreglan, eins og önnur mannréttindaákvæði eru einstaklingsbundin réttindi. Að það séu jafn margir af hvoru kyni í stjórn félaga hefur ekkert með jafnrétti að gera frekar en að jafn margir að hvoru kyni séu í hverri deild í háskólum, stundi kennslu eða hjúkri okkur. Okkur getur fundist það göfugt að jafnvel skynsamlegt að hlutfall kynjanna sé sem jafnast alls staðar en það hefur ekki með jafnrétti að gera. Kynjakvótar eru í raun andstæðir jafnræðisreglunni,“ segir Brynjar í færslu á Facebook-síðu sinni.
Hann segir að eignarrétturinn sé mikilvægur og einstaklingsbundin mannréttindi sem varin eru í stjórnarskrá.
„Eignarrétturinn er forsenda framfara og velferðar þótt botnfreðnir sósíalistar skilji það ekki. Hann verður ekki skertur nema almenningsþörf krefjist þess. Almenningsþörf krefst þess ekki að jafn margir af hvoru kyni séu í stjórn hvers fyrirtækis frekar en í hverju öðru.“
