Brynjar Níelsson, þingmaður Sjálfstæðisflokksins, gefur Sósíalistaflokk Íslands ekki háa einkunn. Það þarf svo sem lítið að koma á óvart enda hefur Brynjar reglulega gefið öðrum flokkum en Sjálfstæðlokknum á baukinn.
Samkvæmt nýlegum skoðanakönnunum er Sósíalistaflokkurinn á barmi þess að komast inn á þing í kosningunum næsta haust. Í könnun MMR í lok nóvember mældist fylgi flokksins til dæmis 5,0%. Gunnar Smári Egilsson stofnaði flokkinn ásamt hópi fólks árið 2017.
„Ef fer fram sem horfir mun fjölga á Alþingi í hópi smáflokka sem stunda tækisfæris stjórnmál í gegnum fjölmiðla. Fæstir byggja á einhverri hugmyndafræði eða framtíðarsýn og þrífast á því að sá tortryggni og ala á öfund og neikvæðni. Kann að vera að sá sem þetta skrifar sé að kasta steinum úr glerhúsi þegar neikvæðni er annars vegar en látum það liggja á milli hluta að sinni,“ segir Brynjar sem kallar Sósíalistaflokkinn eins manns flokk.
„Sá flokkur má eiga það að hann byggir á einhverri hugmyndafræði og sýn. Hún er að vísu skelfileg og á álíka erindi í nútímann og það að menn taki aftur upp lurkinn til að ná sér í eiginkonu,“ segir Brynjar sem hefur enga trú á sóíalisma.
„Menn sem trúi því að sósíalískt samfélag byggt á kenningum og hugmyndafræði Marx og Leníns komi til með að bæta kjör launafólks og gera samfélagið betra hafa annað hvort verið í dái meira og minna alla sína ævi eða bera ekkert skynbragð á manninn og mannlegt samfélag.“
Andri Sigurðsson, stjórnarmaður í félagastjórn Sósíalistaflokksins, svarar færslu Brynjars og segir að áróður hægrisins gegn sósíalisma sé nánast alltaf sá sami og snúist um Lenín, Stalín og að sósíalismi sé gamaldags.
„Þessu er tönglast á þrátt fyrir að kapítalismi sé augljóslega eldri hugmyndafræði sem veldur bókstaflega kreppum á 4-7 ára fresti og setur samfélagið á hliðina. Hugmyndafræði sem setur gríðarleg völd og auð í hendur örfárra og velur í leiðinni fátækt og skorti. Hugmyndafræði sem er á góðri leið með að eyða öllu lífi af yfirborði jarðar vegna hlýnunar. Mögnuð hugmyndafræði það,“ segir Andri sem bætir við að allt sem er einhvers virði í samfélaginu; réttindi og félagsleg kerfi séu sósíalisma eða baráttu sósíalista og verkafólks að þakka.
„Réttindi sem hafa verið dregin úr köldum krumlum hægrisins og hinna ríku þrátt fyrir mikla andstöðu. Þar má nefnda átta tíma vinnudag, bann við barnaþrælkun, helgar- og sumarfrí, félagslegt húsnæði, opinbert heilbrigðiskerfi og menntun. Hvað hefur hægrið fram að færa? Einkavæðingu? Milljarðarmæringa sem grafa undan lýðræðinu? Ekkert nema meiri ójöfnuð og fátækt.“
