Brynjar Níelsson, þingmaður Sjálfstæðisflokksins, kveðst vera hissa á þeim hörðu viðbrögðum sem grein hans um sóttvarnaaðgerðir yfirvalda hlaut í gær. Gagnrýndi hann þær hörðu aðgerðir sem gripið hefur verið til og sagðist janframt vera hættur meðvirkni með aðgerðum yfirvalda.
Sjá einnig: Brynjar fær á baukinn eftir umdeildan pistil: Ekki mannréttindi að mega ganga um og smita aðra
Brynjar ræddi málið við Sigmar Guðmundsson í Morgunútvarpinu á Rás 2 í morgun.
Sigmar spurði Brynjar meðal annars hvað hann ætti við þegar hann segðist vera hættur meðvirkni með aðgerðum yfirvalda.
„Það felur í sér að ég hef sannfærst með tímanum að þessar aðgerðir, þessar miklu almennu og íþyngjandi aðgerðir, séu til meira ógagns en gagns þegar á heildina er litið,“ sagði Brynjar sem sagðist leyfa sér að hafa þá skoðun og það hafi heldur betur vakið viðbrögð.
„Sem segir manni raunverulega hvað lýðræðið og frelsið er viðkvæmt, að maður skuli leyfa sér að hafa einhverja aðra skoðun þá ertu nánast orðinn eins og, tjah, föðurlandssvikari eða jafnvel morðingi. Ég hef sannfærst smátt og smátt – ekki það að það eigi ekki að bregðast við – heldur er ég bara að segja að ég tel okkur hafa farið ranga leið og ekki bara okkur heldur allan heiminn. Og við sitjum hugsanlega uppi með meira tjón heldur en það sem við erum að reyna að bjarga í kringum veiruna.“
Brynjar sagðist í viðtalinu í morgun hafa tekið fram hverjir væru í raunverulegri hættu vegna veirunnar.
„Það eru þeir sem eru mjög aldraðir, mjög veikir fyrir, aðrir eru bara ekkert í hættu. Flestir veikjast ekki neitt, aðrir mjög lítið og svo erum við með mjög afmarkaðan hóp,“ sagði Brynjar sem sagðist hreint ekki viss um að rétta leiðin væru þessar íþyngjandi almennu aðgerðir sem hann telur hafa veruleg áhrif á líf og heilsu fólks.
„Það eru á þriðja tug þúsunda sem missa lífsviðurværi. Börn og ungmenni eru meira og minna í einangrun, halda menn að þetta hafi ekki nein áhrif,“ spurði Brynjar sem sagðist hafa skilning á viðbrögðum sóttvarnayfirvalda. Ef hann sjálfur yrði settur í teymi þar sem markmiðið væri að beita öllum ráðum til að hindra útbreiðslu veirunnar myndi hann líka gera það sama.
„Ég væri ekkert að hugsa um hitt, fátæka fólkið, ég er bara að hugsa um að einhver veiran verði ekki hérna sem að vísu dugar ekki því hún verður alltaf hérna. Menn geta haft einhverja aðra skoðun en ég á þessu, en viðbrögðin við því að vera á annarri skoðun og hvernig lætin verða. Ég er bara svolítið hissa á því,“ sagði Brynjar meðal annars en viðtalið má hlusta á í heild sinni hér.
