Brynjar bíður eftir að unga fólkið rísi upp

„Ég er alltaf að bíða eftir því að ungt fólk rísi al­menni­lega upp gegn allri þessari pólitísku rétt­hugsun sem tröll­ríður sam­fé­laginu og berjist fyrir raun­veru­legu frelsi í stað að sætta sig við að ríkis­valdið leiði okkur í gegnum lífið skref fyrir skref.“

Þetta segir Brynjar Níels­son, þing­maður Sjálf­stæðis­flokksins, á Face­book-síðu sinni. Hann segir að pólitísk rétt­hugsun sé hættu­leg hverju sam­fé­lagi. Sagan hafi kennt okkur það.

„Rétt­hugsunin dregur jafnt og þétt allan þrótt úr ein­stak­lingnum og dregur úr sam­keppnis­hæfni sam­fé­lagsins. Ó­hjá­kvæmi­lega fylgir of­stæki sem er skað­legt fyrir lýð­ræðið og réttar­ríkið. Smátt og smátt hverfur öll kímni­gáfa og depurð og kvíði yfir­tekur allt eins og merkja má á þessari færslu,“ segir hann.

Margir hafa skrifað at­huga­semdir undir færslu Brynjars, þar á meðal góð­kunningi hans, Björn Leví Gunnars­son, þing­maður Pírata.

„Af því að pólitískt rang­læti er verra vanda­mál. Þú veist, eins og að hunsa niður­stöður þjóðar­at­kvæða­greiðslu. Kannski ef rang­lætið hættir þá lagast þetta bara allt? Líka við­brögðin við því sem vill oft til að er upp­nefnt pólitísk rétt­hugsun.“

Jakob Bjarnar Grétars­son, blaða­maður á Vísi, tekur undir það að pólitísk rétt­hugsun sé stór­skað­legt fyrir­bæri og bein­tengd með­virkni.

„Og eins og Brynjar segir, húmors­leysið verður al­gert. Það er til að mynda ekki til neitt sem heitir pc grín ein­fald­lega vegna þess að tví­ræðnin, marg­ræðnin, túlkunar­rýmið er horfið; háskinn og hið ó­vænta er farið. Þetta er fyrir­sjáan­legt og drep­leiðin­legt,“ segir hann.

Egill Helga­son fjöl­miðla­maður segir að líkur séu á að Brynjar þurfi að bíða lengi.

„Það sem þú kallar pólitíska rétt­hugsun er mjög sterk hjá yngra fólki - við sem eldri erum skiljum miklu verr alla núansa "woke" kúltúrsins. En kannski er kyn­slóð núna á leik­skólunum sem gerir upp­reisn - hver veit?“