„Síðustu vikur hef ég rétt eins og í skáldsögum blikkað augunum margoft og klórað mér í höfðinu til að fullvissa mig um að mig sé ekki að dreyma,“ segir Brynhildur Bolladóttir, lögfræðingur, fyrrverandi upplýsingafulltrúi og lestrarhestur, í pistli sem birtist á vef Vísis í dag.
Þar gerir hún þá ákvörðun að hætta akstri Bókabílsins að umtalsefni eftir rúm 50 ár á götunni. Fjölmargir hafa nýtt sér þjónustu Bókabílsins að undanförnu og er Brynhildur og börn hennar í þeim hópi.
„Á fimmtudögum sjáum ég og dóttir mín bláu rútuna keyra inn Laugalækinn á leið okkar heim úr leikskólanum og hún æpir upp yfir sig af gleði „Bókabíllinn!“ og við förum og veljum okkur bækur í ævintýraheiminum sem bíllinn er. Ég og hún. Gæðastundir.“
Brynhildur segir að kaldhæðni örlaganna sé sú að strákurinn hennar, nú 18 mánaða, muni eins og fram horfir ekki fá að upplifa þessar stundir – gleðina við það þegar bíllinn keyrir inn götuna og hann getur valið sér ævintýri til að týna sér í, flett í gegnum bækur og vegið og metið hverjar skuli taka með heim.
„Strákurinn minn sem finnst svo gaman að lesa, mun læra að lesa sjálfur og kunna að lesa sér til gagns mun ekki fá þessar stundir,“ segir hún.
Brynhildur bætir við að fjölskyldan noti bókasöfnin líka, en ekkert sé beint í göngufjarlægð frá heimili fjölskyldunnar. Staðreyndin sé sú að bókasöfn eru eitthvað það stórkostlegasta sem til er og Borgarbókasafnið bjóði svo sannarlega frábæra þjónustu í allskonar formi.
„Ég geri mér grein fyrir því að verkefni borgarinnar eru mörg og ærin, málaflokkarnir eru margir og flóknir, fjármagnið af skornum skammti. Eins og alltaf.“
Brynhildur segir að í stóra samhenginu séu 100 milljónir í nærþjónustu sem eykur ánægju og gleði af lestri lítið.
„Þegar ég hugsa út fyrir heimilisbókhaldið mitt og yfir í rekstur borgarinnar þá get ég ekki annað en spurt mig hvort þetta sé í alvöru sú forgangsröðun sem þurfi að fara í. Fátt hefur verið háværara í umræðu um skólakerfið sl. ár en hvernig lestrarkunnáttu og lesskilningi fari aftur, fyrir utan auðvitað mögulega útdauða íslenskunnar. Ekkert af þessu er nú kannski á ábyrgð Bókabílsins, en hverfi hann þá styður það a.m.k. ekki við bækur í nábýli fólks í Laugarnesi, Kjalarnesi, Fossvogi, Hlíðum, Grafarholti…“
Brynhildur segir að í stað þess að hætta akstri ætti Bókabíllinn í raun að aka meira, stoppa á fleiri stöðum.
„Kæri Dagur borgarstjóri, kæra Pálína borgarbókavörður. Ég skrifa þessi orð í veikri von um að ákvörðuninni verði snúið við og Bókabíllinn efldur þess í stað. Borgin gerð enn blómlegri en hún er, með ávöxtum bókmenntanna sem auðga lífið svo sannarlega. Leyfum Bókabílnum að gera það sem hann gerir svo vel, að vera úti að aka.“
