Bryndís Haraldsdóttir, þingkona Sjálfstæðisflokksins, segir að einkaframkvæmd sé eina lausnin þegar kemur að Sundabraut. Þetta segir Bryndís í aðsendri grein í Morgunblaðinu í dag.
„Álag á samgöngukerfið á Íslandi hefur aukist mikið á síðasta áratug eða svo, tvær milljónir ferðamanna fóru um þjóðvegi landsins og við heimamenn vorum duglegir að ferðast og fara á milli staða. Því miður fylgdi nauðsynlegt fjármagn til vegamála ekki í kjölfarið og þrátt fyrir mikla innspýtingu á síðustu árum þá eigum við enn langt í land með að tryggja öryggi á þjóðvegum landsins.“
Bryndís segir að Sundabrautin verði mikilvæg samgöngubót fyrir höfuðborgarsvæðið en einnig fyrir landsbyggðina.
„Kostnaður við Sundabraut er áætlaður á bilinu 70-80 milljarðar. Til samanburðar var allt nýframkvæmda- og viðhaldsfé Vegagerðarinnar á landinu öllu á 10 ára tímabili 2007-2017 á verðlagi ársins 2018 um 160 milljarðar, eða eins og tvær Sundabrautir. Fjárfestingar í vegum og samgöngumannvirkjum hafa sem betur fer aukist á síðustu árum. Heildarframlög til Vegagerðarinnar hafa farið úr um 25 milljörðum í 30 milljarða, en þar eru bæði innviðir í flugi, siglingum og vegakerfi. Það er því algjörlega óraunhæft að ætla að hægt sé að taka 70-80 milljarða, til að leggja Sundabraut, úr ríkissjóði,“ segir Bryndís.
Hún segir að það myndi kalla á að ekkert annað yrði gert í viðhaldi eða uppbyggingu samgöngumannvirkja annars staðar á landinu eða að fjármagn til þess málaflokks yrði tekið úr öðrum mikilvægum málaflokkum eins og heilbrigðiskerfinu, menntakerfinu og löggæslu svo eitthvað sé nefnt.
„Hér þarf einfaldlega aðrar lausnir. Í mörg ár hefur verið bent á möguleika á samstarfsverkefni einkaaðila og hins opinbera, svokölluð PPP-verkefni, og eru Hvalfjarðargöng besta dæmið um slíkt hér á landi.“
Bryndís bendir á að hún hafi, ásamt nokkrum þingmönnum Sjálfstæðisflokksins, lagt fram þingsályktun þar sem lagt var til að Sundabraut yrði boðin út í einkaframkvæmd.
„Áhugasamir hópar geta þá komið með sína útfærslu af legu, aðferðafræði, hönnun, fjármögnun og rekstri. Viðkomandi hefðu heimild til að rukka veggjöld í ákveðinn tíma, en að þeim tíma liðnum yrði mannvirkið ríkisins.“
Bryndís kveðst sannfærð um að þetta sé raunhæf leið til að sjá Sundabraut verða að veruleika. „Ég tel að lífeyrissjóðir og aðrir fjárfestar sem horfa til lengri tíma telji Sundabraut arðbæran og álitlegan fjárfestingakost. Látum á það reyna og könnum hvort einkaframtakið hafi burði í að reisa Sundabraut. Framkvæmdina sem rifist hefur verið um í hátt í 50 ár. Við höfum engu að tapa en allt að vinna.“
