Óeirðir hafa geisað víða í Bandaríkjunum undanfarna daga eftir að George Floyd var drepinn af lögregluþjóni í Minneapolis. Einar Eiðsson, hönnuður sem búsettur er í New York, lýsir ástandinu í Fréttablaðinu í dag en brotist var inn í verslun hans.
„Það er ekkert gaman að vera í þessari borg núna, hún er bara allt öðruvísi en hún á að sér að vera,“ segir hann í Fréttablaðinu. „Það er mjög skrítið ástand hérna. Það er búið að byrgja fyrir glugga flestra verslana og flestallt er bara lokað,“ bætir hann við.
Einar rekur verslun í borginni ásamt eiginkonu sinni, Alpana Bawa fatahönnuði. Þau voru stödd úti í sveit um helgina þegar hringt var í þau og þau látin vita að búið væri að brjóta gluggann í versluninni og óprúttnir aðilar væru að brjótast inn.
Atvikið átti sér stað aðfaranótt sunnudags og sneru hjónin strax til borgarinnar þar sem ófögur sjón blasti við. Búið var að mölbrjóta gluggann og þurftu þau að byrgja fyrir með timbri. Þau höfðu samband við lögreglu en fengu þau skilaboð að lögregla hefði ekki tíma til að sinna þessu verkefni.
Nánar er fjallað um málið í Fréttablaðinu í dag.
