Svavar Vignisson, lögreglumaður í Vestmannaeyjum og bróðir Elliða Vignissonar, fyrrverandi bæjarstjóra í Eyjum, segir að honum þyki sárt að sjá það viðhorf sem birst hefur í umræðum á netinu undanfarna daga.
Elliði deildi mynd af bróður sínum á Facebook-síðu sinni á dögunum og er óhætt að segja að færslan hafi vakið viðbrögð. Þar tengdi hann hörmungaratvikið í Bandaríkjunum, þegar George Floyd, var drepinn af lögregluþjóni við stöðu lögreglunnar á Íslandi.
„Um allan heim mótmælir fólk nú eðlilega ofbeldi lögreglu í USA í garð almennings. Hér á Íslandi glímum við við ofbeldi almennings gagnvart lögreglu. #gerumbetur,“ skrifaði Elliði og birti mynd af bróður sínum, Svavari lögreglumanni.
Hvattur til að eyða færslunni
Færslan vakti mikil viðbrögð og var Elliði hvattur til að eyða færslunni. „Þú ættir að eyða þessu í einum hvelli. Þetta er það vandræðalegasta sem nokkur manneskja hefur sett á facebook. Þú hlýtur að geta komið þessum skilaboðum áleiðis á smekklegri hátt,“ skrifaði ein kona undir færslu Elliða.
Svavar skrifaði færslu á Facebook í gærkvöldi sem farið hefur víða en þar segir hann meðal annars:
„Facebook status með mynd af mér hefur farið eins og eldur um sinu undanfarna daga […] og hef ég verið kallaður ýmsum frekar ljótum nöfnum allt frá því að fólki verði óglatt af henni, svín, morðingi ofl. Ég tek því ekki persónulega, grunar að það snúi að starfi mínu frekar en mér. “
Kvartar ekki undan erfiðri vinnu
Svavar segist ekki hafa verið viðbúinn því að færslan myndi vekja svo mikla athygli. „Ég veit ekki hvernig fólk hefur skilið þennan status (eða vill ekki skilja) en hann kom í kjölfarið á því að við vorum að ræða ofbeldi í garð mín sem lögreglumanns og annara félaga minna og hvort ekki mætti gera betur í þeim efnum. Við ræddum hversu hroðaleg ástandið væri í Bandaríkjunum og víðar. Óskuðum þess báðir að hægt yrði að snúa ofan af þróuninni hér á landi til að ekki kæmi til vopnaburðar lögreglumanna. Við ræddum hvort ég sem lögreglumaður gæti gert betur og margir félagar minna líka,“ segir Svavar og bætir við að ekkert í samtali þeirra hafi gefið til kynna að andlát George Floyd væri ekki ömurlegt eða dæmi sem hafa komið upp hér á landi.
„Mér þykir hins vegar sárt að sjá það viðhorf sem kemur fram í mörgum „komentum“ á þræði Elliða,“ segir Svavar og bætir við að þau skýri ef til vill að einhverju leiyi starfsumhverfi lögreglumanna.
„Ég hef unnið margskonar störf í gegnum tíðina. Man ekki áður til að vera kallaður „svín“, „morðingi“, „ógeð“ og margt sambærilegt eins og sumir gera. Lögreglumenn vinna oft erfiða vinna og ekki er ég að kvarta undan henni. Ég veit að ég og kollegar mínir um allt land getum gert betur. Ég held samt að að við getum gert betur í báðar áttir,“ segir hann.
Svavar endar færsluna á þeim orðum að staðreyndin sé sú, eins og kom fram í stuttri færslu Elliða, að lögreglumenn hér á landi verði fyrir ofbeldi.
„Það er staðreynd og engir orðaleppar breyta því. Það er aldrei óviðeigandi að benda á ofbeldi, sama hver gerandin er og sama hver þolandinn er.“
