Héraðsdómur Reykjaness hefur dæmt karlmann í 30 daga skilorðsbundið fangelsi fyrir ofbeldi gegn lögreglumanni sem var við skyldustörf.
Atvikið sem um ræðir varð á Nýbýlavegi sunnudaginn 24. febrúar 2019, en lögreglumenn stöðvuðu för mannsins eftir að hafa veitt því athygli að hann væri ekki í öryggisbelti við akstur bifreiðar sinnar.
Var ekki í öryggisbelti
Samkvæmt málsgögnum játaði maðurinn að hafa ekið án öryggisbeltis og beið hann í bifreið sinni meðan rituð var vettvangsskýrsla. Eftir ritun skýrslunnar fór lögreglumaður til mannsins og útskýrði fyrir honum efni skýrslunnar og kynnti fjárhæð sektar fyrir brotið.
Við það er maðurinn sagður hafa sturlast, rifið til sín skýrslumöppuna, ýtt við lögreglumanninum og gripið með vinstri hendi í öryggisvesti lögreglumannsins. Maðurinn var einnig ákærður fyrir að ógna lögreglumanninum með því að slá til hans með krepptum hnefa með hægri hendi en sýknaður af þeim hluta ákærunnar.
Að því er fram kemur í dómi héraðsdóms var maðurinn handtekinn og fluttur á lögreglustöðina við Dalveg í Kópavogi. Í samtali við varðstjóra greindi maðurinn frá því að stundarbrjálæði hefði komið yfir hann og hann ekki getað haft stjórn á sér. Maðurinn var frjáls ferða sinna í kjölfarið.
Ekki boðið að ræða málið
Við skýrslutöku hjá lögreglu þann 12. júlí í fyrrasumar greindi hann frá því að hann hefði gleymt að spenna á sig beltið og raunar verið í vandræðum með það þegar lögregla stöðvaði hann. Hann hefði búist við því að vera kallaður inn í lögreglubifreiðina til að ræða málin og segja sína hlið á atvikinu.
Þess í stað „hefði bara verið komið með sektina beint til hans og honum ekki boðið að ræða málið“ eins og segir í dómi. Skyndilega hefði fokið í hann og hann neitað að skrifa undir sektargerðina og kuðlað miðanum saman.
Vildi loka hundinn inni
Maðurinn viðurkenndi að hafa sýnt mótþróa við handtökuna en hann hefði margbeðið um að fá að loka hurðinni á bifreið sinni og loka með því hund sinn inni í bifreiðinni. Hann hefði ekki lagst í götuna fyrr en honum hafði verið hótað með piparúða. Maðurinn sagði lögreglu hafa sýnt fautaskap við handtökuna.
Dómari taldi sannað að maðurinn hefði gerst sekur um ofbeldi gagnvart lögreglumanni og var hann sakfelldur fyrir brot gegn valdstjórninni. Hann hefur ekki áður sætt refsingu. Dómurinn er skilorðsbundinn til tveggja ára. Auk þess var honum gert að greiða þóknun verjanda síns, 310 þúsund krónur.
