Héraðsdómur Reykjaness hefur dæmt karlmann í tveggja mánaða skilorðsbundið fangelsi fyrir að ráðast á þáverandi sambýliskonu sína.
Atvikið átti sér stað þann 4. nóvember 2017 en maðurinn var ákærður fyrir að veitast fyrirvaralaust á konuna á heimili þeirra þar sem hún lá sofandi uppi í rúmi. Er hann sagður hafa haldið fyrir munn hennar og slegið hana ítrekað í andlitið með krepptum hnefa, tekið hana hálstaki og bitið í hægra eyra. Afleiðingar árásarinnar voru þær að konan hlaut meðal annars mar á vinstra augnloki og augnsvæði og mar á vinstri kinn.
Þegar lögregla kom á vettvang sagði fórnarlamb árásarinnar að ástæða árásarinnar hafi verið sú að maðurinn hennar hafi verið ósáttur við að ókunnugur karlmaður hefði sett „like“ við mynd af henni á Instagram.
Þennan framburð staðfesti maðurinn í skýrslutöku hjá lögreglu. Hann hefði séð, eftir að hann kom heim um morguninn, að „einhver strákur“ hefði verið búinn að setja „like“ á brotaþola á netinu. Við það hefði hann brjálast og ráðist á konuna. Kom fram að hann hefði verið mjög drukkinn þegar þetta gerðist og honum liði illa vegna málsins.
Maðurinn neitaði hins vegar sök þegar málið var þingfest í febrúar á þessu ári og ítrekaði þá afstöðu sína við aðalmeðferð málsins. Var hann búinn að breyta framburði sínum á þá leið að hann hafi verið að verjast árás konunnar þegar hann tók símann hennar til að skoða hann.
Dómari mat þann framburð ekki trúverðugan og dæmdi manninn í tveggja mánaða fangelsi. Dómurinn er skilorðsbundinn til tveggja ára. Þá var honum gert að greiða konunni 450 þúsund krónur í bætur og sakarkostnað málsins, samtals tæplega 440 þúsund kr
