Bríet skorar á alla að gerast vegan: „Við erum að horfa á öfga­fullar að­stæður þar sem nauð­syn­legt er að taka stór skref“

„Í amstri dagsins er auð­velt að gleyma sér í hvers­dags­leikanum. Við hugsum um vinnuna eða skólann, og hvað verði í kvöld­matinn. Við heyrum talað um lofts­lags­vána í fréttunum og hversu stórt vanda­mál hún er. Við fáum hnút í magann og skiptum um rás. Það er ein­fald­lega auð­veldara að hugsa ekki of mikið um þetta, því þegar við byrjum að pæla mikið í málunum er auð­velt að upp­lifa hinn al­genga loft­lagskvíða,“ skrifar Bríet Ísey með­limur í stjórn Sam­taka Græn­kera á Ís­landií nýjum pistli á Vísi.

„Í þessari erfiðu og al­var­legu stöðu sem við erum í, eru æ fleiri sem upp­lifa svart­sýni og hugsa með sér hvort einn ein­stak­lingur geti í raun komið af stað al­vöru breytingum. Þetta er skiljan­legur hugsana­gangur, en mikil­vægt er að vera bjart­sýn og muna að í fjöldanum er kraftur. Við sem ein­staklingar getum haft gífur­leg á­hrif, enda sjáum við að því fleiri sem taka stöðu og standa með um­hverfinu, því meiri þrýstingur leggst á á­byrgðar­aðila að standa sig betur. Það er ekki langt síðan lofts­lags­málin voru lítið sem ekkert rædd á vett­vangi stjórn­valda. Nú er það eitt tíð­ræddasta um­ræðu­efnið,“ heldur Bríet á­fram.

Hún trúir því að við viljum öll gera okkar besta.

„Við byrjum að flokka eins og engin sé morgun­dagurinn og kaupum vist­vænu vöruna frekar en hina sem við erum vön. Við skoðum hvað raf­magns­bílar kosta og fáum kvíða­kast, og á­kveðum að taka frekar oftar strætó.“

„Eitt sem gleymist þó oft í um­ræðunni um mátt okkar ein­stak­linga til að sporna gegn lofts­lags­vánni er dýra­iðnaðurinn. Rann­sóknir sýna okkur hversu mikil og slæm á­hrif hann hefur á náttúruna og lofts­lagið. Já líka hér á Ís­landi. Staðan er ein­fald­lega sú, að ef þú vilt minnka kol­efnis­fót­spor þitt er breyting á matar­æðinu eitt stærsta skref sem þú getur tekið. Það að forðast dýra­af­urðir og borða sem mest úr plöntu­ríkinu hefur gífur­lega já­kvæð á­hrif. Sumum finnst þetta hljóma öfga­fullt, en við erum að horfa á öfga­fullar að­stæður þar sem nauð­syn­legt er að taka stór skref. Aldrei hefur verið auð­veldara að sleppa dýra­af­urðum en í dag og það skerðir sannar­lega ekki lífs­gæði fólks að taka skref í þá átt. Þvert á móti getur það haft já­kvæð á­hrif,“ skrifar Bríet.

„Það þurfa ekki allir að verða vegan á einni nóttu. Hins vegar vil ég hvetja ykkur til að minnka neyslu dýra­af­urða, þó svo það sé bara einu sinni eða tvisvar í viku, því það gerir heilan helling í heildar sam­henginu.“

„Þegar við vitum að græn­metis­æta á bensín­bíl gerir meira fyrir um­hverfið heldur en kjöt­æta á hjóli, er náttúru­legt að spyrja; hversu mikils virði eru þessar 15 mínútur sem það tekur okkur að borða steikina okkar, í raun og veru? Margt smátt gerir eitt stórt og hver veit, kannski finnur þú glæ­nýjar upp­á­halds upp­skriftir eða losnar jafn­vel við maga­verkina?“

„Ég skora á þig, kæri lesandi að kynna þér kostina við vegan matar­æði, bæði fyrir þig og um­hverfið. Ég get lofað þér því sem fyrrum kjöt­æta, að kostirnir eru mun fleiri en gallarnir.“