Hannes Hólmsteinn Gissurarson, hinn umdeildi prófessor í stjórnmálafræði við Háskóla Íslands, fékk 2,5 milljónir króna í styrki frá Reykjavíkurborg í fyrra. Ekki liggur fyrir fyrir hvað hann hlaut styrkinn.
Þetta kemur fram í skýrslu Fjármála- og áhættustýringarsviðs Reykjavíkurborgar sem lögð var fyrir borgarráð í gær. Töluvert af einstaklingum fengu styrki, fyrir ýmis verkefni væntanlega.
Í inngangi skýrslunnar segir að „almennt virðist framkvæmd á upphaflegum styrkjareglum komin í gott horf“. Enn fremur segir þar að „almennt má álykta út frá svörum undanfarin ár að reglum um styrki, samstarfssamninga, þjónustusamninga og rekstrarsamninga sé vel fylgt eftir á öllum sviðum og reglum framfylgt eins og lagt er upp með.“
Reykjavíkurborg styrkti stjórnmálaflokka á vel yfir 20 milljónir króna í fyrra og fékk Sjálfstæðisflokkurinn mest eða tæpar 7,9 milljónir króna og Samfylkingin nærri 6,7 milljónir, Píratar í Reykjavík voru styrkt um tæplega 2 milljónir, Sósíalistaflokkurinn fékk 1,7 milljón, Miðflokkurinn fékk tæpar 1,6 milljónir, Vinstri græn fengu 1,1 milljón og Flokkur fólksins rúmlega eina milljón.
