Bolli ó­sáttur: Býr ekki bara á Spáni – „Engin á­­stæða til að óttast okkur“

Bolli Kristins­son, kaup­maður, Reyk­víkingur og íbúi við Lauga­veg, segir að Lauga­vegurinn sé hægt og ró­lega að breytast í drauga­stræti. Bolli skrifar grein í Frétta­blaðið í dag þar sem hann svarar leiðara Kol­brúnar Berg­þórs­dóttur sem birtist í Frétta­blaðinu þann 24. septem­ber síðast­liðinn.

„Þar notar hún þann dálk blaðsins þar sem rit­stjórnar­stefnan kemur fram til að út­húða mér og kallar mig „tuðara“,“ segir Bolli í grein sinni en til­efnið var aug­lýsing þar sem hann fór yfir 19 at­riði sem sýna í hvers konar öng­stræti stjórnun Reykja­víkur­borgar er komin, að mati Bolla.

„Í um­ræddri for­ystu­grein Frétta­blaðsins vitnar Kol­brún í borgar­stjóra sem gaf í skyn að þar sem ég byggi hluta úr ári á Spáni hefði ég ekki gengið um götur borgarinnar til að sjá þá meintu dýrð sem meiri­hluti borgar­stjórnar undir hans for­ystu hefði skapað. Þeim báðum, Degi og Kol­brúnu, láðist að minna á að ég bý líka hluta úr ári á Lauga­vegi og við þá götu hef ég starfað stærstan hluta ævinnar og búið með hléum um ára­tuga­skeið,“ segir Bolli meðal annars.

Hann segir að öllum megi ljóst vera að Lauga­vegurinn, eina skil­greinda verslunar­gata Reykja­víkur og aðal­verslunar­gatan, er að breytast hratt og örugg­lega í drauga­stræti.

„Tómum rýmum fjölgar ört og ekki tjóir að kenna far­sóttinni um eða aukinni net­verslun. Við höfum séð á eftir fjölda þekktra verslana á síðustu misserum sem hafa flutt starf­semi sína í önnur verslunar­hverfi og blómstra þar sem aldrei fyrr. Nú er svo komið að 38 rými standa auð og ó­notuð við Lauga­veg, frá Hlemmi niður að Banka­stræti. Ef við setjum þessi rými í röð niður Lauga­veg er laust rými á rúm­lega 27 metra milli­bili.“

Bolli segir að þetta sé ógn­vekjandi stað­reynd sem bæði Kol­brún og Dagur kjósa að horfa fram hjá.

„Dagur B. Eggerts­son hefur ekki enn svarað boði mínu og fé­laga minna í Mið­bæjar­fé­laginu í Reykja­vík um að ganga með honum götuna svo hann fái að kynna sér hvernig á­standið raun­veru­lega er. Við lifum í þeirri veiku von að hann sjái ljósið. Okkur langar líka að bjóða Kol­brúnu með okkur í göngu­ferð um svæðið, hvort sem borgar­stjórinn verður með í för eða ekki. Það er engin á­stæða til að óttast okkur kaup­menn, því eins og ég sagði í svari mínu til Dags B. Eggerts­sonar, þá munu þau fá góðar mót­tökur hjá grand­vöru sóma­fólki sem hefur margt hvert helgað sig rekstri á Lauga­vegi alla sína starfs­tíð og ber hag götunnar fyrir brjósti.“

Bolli segir að honum hafi undan­farin ár þótt á­takan­legt að horfa upp á hnignun Lauga­vegarins. Nú keyri um þver­bak og götunni sé að blæða út.

„Þetta er sér­lega sárt þar sem ég lifað og starfað við götuna stærstan hluta lífs míns og ber til hennar sterkar taugar. Á sama tíma er ó­skiljan­legt að vel menntað og hugsandi fólk líkt og Dagur B. Eggerts­son og Kol­brún Berg­þórs­dóttir hrein­lega neiti að horfast í augu við stað­reyndir og geri lítið úr bar­áttu fólks fyrir að við­halda lífs­viður­væri sínu. Nei, því skal bara mætt með skætingi og yfir­læti. Það er samt aldrei of seint að sjá að sér og boðið í göngu­ferðina stendur enn opið.“