Blaða­manna­fundur ríkis­stjórnarinnar „með því allra ó­svífnasta“ sem Gunnar Smári hefur séð

Gunnar Smári Egils­son, fyrrverandi ritstjóri og núverandi meðlimur í Sósíal­ista­flokknum, skýtur föstum skotum að ríkis­stjórn Ís­lands og segir að blaða­manna­fundur hennar í Hörpu fyrr í dag hafi verið með því allra ó­svífnasta sem hann hafi séð.

Þetta kemur fram í að­sendri grein Gunnars á Vísi. „Ríkis­stjórn kynnir eitt­hvað sem gæti litið út fyrir ó­kunnuga sem hertar að­gerðir á landa­mærum, en sem eru það í raun ekki,“ skrifar Gunnar. Þá næst telur hann upp það sem þjóðin hefur þurft að þola síðast­liðið ár og segir hertar að­gerðir sem boðaðar hafa verið engu breyta.

„Ég trúi því ekki að Al­þingi láti hafa sig að fífli með því að taka þetta boðaða frum­varp til með­ferðar; sex vikna heimild til að leggja kvaðir á fólk sem ekki mun koma hingað? Sem svar við kröfum al­mennings um hertar að­gerðir strax?

Þau sem héldu að ríkis­stjórnin væri að boða eitt­hvað í líkingu við Ný­sjá­lensku leiðina við landa­mærin hljóta að hafa orðið fyrir sárum von­brigðum.“

Ekkert Evrópu­land með fleira en 1000 smit

Þá bendir Gunnar Smári á að ekkert Evrópu­land sé með fleiri en 1000 smit á síðustu 14 dögum á hverja 100 þúsund íbúa sam­kvæmt tölum evrópsku sótt­varnar­stofnunarinnar.

„Í dag verður því enginn ferða­maður þaðan undan­tekningar­laust skikkaður í sótt­varna­hús sam­kvæmt ráða­gerðum ríkis­stjórnarinnar. Og enginn eftir 1. júní. Þá verður enginn skikkaður í sótt­varna­hús, ekki einu sinni fólk sem kemur frá löndum með fleiri en 1000 smit á 100 þúsund íbúa, sem í dag eru að­eins örfá lönd í heiminum og ekkert sem hefur beinar flug­tengingar við Ís­land, lík­lega ekki önnur lönd en Cura­cao, Ber­muda og San Marino. Var ein­hver að krefjast reglna um flug­sam­göngur við þau?“

Hann telur því næst upp þau sex lönd þar sem smit eru á milli 750-1000 síðustu 14 daga á hverja 100 þúsund íbúa. Það eru Ung­verja­land, Pól­land, Kýpur, Eist­land, Sví­þjóð og Frakk­land.

„Ekkert flug kemur frá þessum löndum til Kefla­víkur á morgun en vél er ráð­gerð frá Stokk­hólmi á fimmtu­dag. Far­þegar úr þeirri vél verða skikkaðir í sótt­varna­hús og verða vera þar í fimm daga nema þeir geti sýnt fram á að þeir geti dvalið annars staðar í sótt­kví við við­unandi að­stæður, t.d. heima hjá sér, í sumar­bú­stað eða ein­hvers staðar þar sem telja má að hægt sé að dvelja í fimm daga án sam­gangs við annað fólk. Eins og dæmin sanna er ekki þar með sagt að fólkið dvelji á þessum stöðum eða haldi sótt­kví.“

Segir þá sem vildu engar að­gerðir hafa orðið ofan á

Að síðustu segir Gunnar Smári að breytingar ríkis­stjórnarinnar muni hafa lítil ef ein­hver á­hrif næstu daga. Og ekki sýni­leg á­hrif næstu sex vikur. Enginn sem geti vísað á við­unandi stað til sótt­kvíar verði skyldaður á sótt­kvíar­hótel.

„Ég trúi því ekki að enginn ráð­herranna í ríkis­stjórn og enginn þing­maður ríkis­stjórnar­flokkanna hafi ekki viljað harðari að­gerðir. Það er því aug­ljóst að þau sem vildu harðari að­gerðir urðu undir kröfum þeirra sem engar að­gerðir vildu. Niður­staðan er í raun engar að­gerðir en þær eru kynntar sem þær séu ein­hverjar að­gerðir. Þau sem engar að­gerðir vildu fengu að ráða inni­haldinu en hin sem vildu að­gerðir fengu að ráða kynningunni. Ein­hver gæti haldið að þar með hafi allir fengið eitt­hvað, en reyndin er auð­vitað að þau sem ekki vildu neinar að­gerðir fengu allt. Hin ekkert,“ skrifar Gunnar Smári.

„En til hvers var þessi blaða­manna­fundur? Mér dettur helst í hug að hann hafi verið sigur­stund fyrir Sig­ríði Á. Ander­sen, Brynjar Níels­son, Ás­laugu Örnu Sigur­björns­dóttur og aðra últra-hægri­menn, fögnuður yfir að halda völdum og geta á­fram rekið stefnu sína þvert á vilja mikils meiri­hluta þjóðarinnar.“