World Class hefur sagt upp 90 starfsmönnum og taka umræddar uppsagnir gildi nú um áramótin. Björn Leifsson, eigandi og framkvæmdastjóri World Class, segir í frétt RÚV að uppsagnirnar nú nái til þeirra sem voru í undir 70% starfshlutfalli og hlutabótaleiðin nær ekki yfir.
Björn – eins og aðrir eigendur líkamsræktarstöðva – hefur gagnrýnt sóttvarnarreglur harðlega en hann telur að mikil mismunun felist í því að líkamsræktarstöðvum sé gert að hafa lokað á meðan önnur starfsemi má vera opin. Fátt annað hafi verið í stöðunni en að segja upp fólki.
Björn segir að ef líkamsræktarstöðin fái að opna í bráð sé möguleiki á því að starfsmennirnir verði ráðnir aftur, en hann sér ekki fram á að það verði á næstunni.
„Eins og ég hef sagt áður þá finnst mér þetta vera fáránleg mismunun, að það megi vera íþróttir alls staðar og sundlaugar opnar - en líkamsræktarstöðvar megi ekki vera opnar. Við getum verið með grímuskyldu, við getum passað bæði sóttvarnir og fjarlægðarmörk. Það er gríðarlega erfitt að vera í þessari stöðu,“ hefur RÚV eftir honum.
